ل ر ت قۇرىلىسى: استانادا سىعاناق، تۇركىستان كوشەسىندەگى قوزعالىس قايتا اشىلادى
بۇگىندە LRT جەلىسىنىڭ بارلىق وبەكتىسىندە قىزۋ جۇمىس ءجۇرىپ جاتىر. سونىمەن قاتار كولىك جۇرگىزۋشىلەرى ءۇشىن جول قوزعالىسى قايتا قالپىنا كەلتىرىلەدى، دەپ حابارلايدى Kazinform.
«بارلىق ۋچاسكە بويىنشا جۇمىستار جوسپارعا ساي ءجۇرىپ جاتىر. ونىڭ ىشىندە سۆايلار، روستۆەرك، ەستاكادا جانە ستانسيا تەمىربەتون كونسترۋكسيالارىنىڭ قۇرىلىس جۇمىستارى. LRT جەلىسى بىرنەشە داڭعىلدى كەسىپ وتەتىن بولعاندىقتان مونوليتتى اركالاردىڭ قۇرىلىسى قاراستىرىلدى. تاۋەلسىزدىك داڭعىلى مەن ش. قالداياقوۆ كوشەسىنىڭ قيىلىسىندا ۋاقىتشا قويىلعان وتكەل 25-قازاننان باستاپ قايتا اشىلدى. بۇگىندە ساۋران، اقمەشىت، تۇركىستان كوشەلەرىنىڭ قيىلىسىندا جۇمىس ءجۇرىپ جاتىر. قازىرگى ۋاقىتتا سىعاناق داڭعىلى بويىنشا «نوماد» تۇرعىن ءۇي كەشەنىنەن تۇركىستان كوشەسىنە دەيىنگى ۋچاسكەدە قوزعالىس شەكتەلگەن. ول جۇمىستى 30-قاراشاعا دەيىن اياقتاپ، قوزعالىستى اشۋدى جوسپارلانىپ وتىر»، - دەدى استانا قالاسى اكىمدىگىنەن Kazinform ءتىلشىسىنىڭ جولداعان ساۋالىنا.
سونداي-اق اكىمدىك LRT جەلىسى قۇرىلىسىن 2024 -جىلى اياقتاۋ كەرەكتىگىن ايتا كەلە، استانالىقتارعا قولايسىزدىقتار تۋدىرعانىن ايتىپ وتىر.
«ودان بولەك اقمەشىت قيىلىسىنداعى ۋاقىتشا اركا اياقتالۋ ساتىسىندا. ابۋ-دابي پلازانىڭ الدىندا عيماراتقا تىكەلەي قوسىلاتىن ستانسيا سالۋ قاراستىرىلعان. ىرگەتاسى قۇيىلىپ جاتىر. قۇرىلىس-مونتاج جۇمىستارى اۋەجايدان جاڭا تەمىرجول ۆوكزالىنا دەيىن قابانباي باتىر، سىعاناق، قالداياقوۆ جانە ا82 كوشەلەرىندەگى LRT جەلىسىنىڭ بارلىق ۋچاسكەسىندە جۇرگىزىلىپ جاتىر»، - دەيدى اكىمدىكتەن.
