ەل نامىسىن قورعاۋ ەرەكشە كوڭىل-كۇي سىيلايدى - ەلەنا رىباكينا
استانا. قازاقپارات - 27-جەلتوقسان – 5-قاڭتار ارالىعىندا اۋستراليانىڭ سيدنەي جانە پەرت قالالارىندا ارالاس كوماندالىق سىندا United Cup تۋرنيرى وتەدى.
قازاقستان تەننيس فەدەراتسياسىنان ءمالىم ەتكەنىندەي، قازاقستاندىقتار يسپانيا، گرەكيامەن بىرگە س توبىنا ءتۇستى.
اتالمىش جارىستا قازاقستان نامىسىن ەلەنا رىباكينا، جىبەك قۇلامبايەۆا، الەكساندر شيەۆچەنكو، دميتري پوپكو جانە كوماندا كاپيتانى الەكساندر نەدوۆەسوۆ قورعايدى.
ەلەنا رىباكينا 27-جەلتوقسان كۇنى باستاپقى ماتچتا يسپانيالىق دجەسسيكا بۋزاس مانەيرو، الەكساندر شيەۆچەنكو پابلو كاررەنو بۋستامەن وينايدى.
ە. رىباكينا وسى مەزگىلدە بريسبەندە WTA 500 دوداسىندا وتكەن جىلعى چەمپيوندىق اتاعى مەن 500 رەيتينگىلىك ۇپايىن قورعاۋعا ءتيىس ەدى. ءبىراق ەلەنا كوماندالىق تۋرنيردى تاڭدادى.
- مەن United Cup جارىسىنا كوپتەن بەرى قاتىسقىم كەلەتىن. تەننيس جەكە سپورت ءتۇرى بولعاندىقتان، بىزدەرگە كوماندالىق دودالارعا ءجيى جول تۇسە بەرمەيدى. مەن ءۇشىن مۇنداي باسەكە ەرەكشە كوڭىل-كۇي سىيلايدى. ەل نامىسىن قورعاۋ دا اسا ماڭىزدى، - دەدى ە. رىباكينا.
قازاقستان United Cup تۋرنيرىندە 2023-جىلى العاش رەت باق سىناعان ەدى.
ەسكە سالا كەتەيىك، بۇدان بۇرىن جىبەك قۇلامبايەۆانىڭ ءۇندىستانداعى جارىستىڭ جارتىلاي فينالىنا وتكەنىن جازعان بولاتىنبىز.
