كەيىنگى 5 ايدا قازاقستان وزبەكستانعا 2 ميلليون توننا استىق ەكسپورتتادى
تاشكەنت. KAZINFORM - بىلتىر قىركۇيەكتەن باستاپ بيىل 16-اقپانعا دەيىن قازاقستان شەت ەلدەرگە 5,4 ميلليون توننا استىق ەكسپورتتادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
«قازاقستان تەمىر جولى» كومپانياسىنىڭ الدىن الا مالىمەتىنە ساي، قامتىلىپ وتىرعان كەزەڭدە ەكسپورت كولەمى %48,3 عا ءوستى.
قازاقستان استىعىن ەڭ كوپ ساتىپ العان ەلدەر كوشىن وزبەكستان باستاپ تۇر. 5 ايدان اسا ۋاقىت ىشىندە بۇل مەملەكەت 2 ميلليون توننا ءونىم يمپورتتادى.
سونىمەن قاتار، تاجىكستان (789 مىڭ توننا)، قىتاي (679 مىڭ توننا)، يران (644 مىڭ توننا)، ازەربايجان (319 مىڭ توننا) جانە اۋعانستانعا (235 مىڭ توننا) ەكسپورتتالعان استىقتىڭ كولەمى ارتتى.
ايتا كەتەيىك، 2024-جىلدىڭ قورىتىندىسى بويىنشا قازاقستان وزگە ەلدەردىڭ نارىعىنا 8,1 ميلليون توننا استىق شىعاردى. بۇعان قوسا، ەلىمىز 2,4 ميلليون توننا ۇن ەكسپورتتاعان. دايىن ءونىمدى ورتالىق ازيا ەلدەرى، قىتاي جانە اۋعانستان كوپ كولەمدە يمپورتتاپ جاتىر.
ەسكە سالايىق، تاياۋدا اۋىل شارۋاشىلىعى ءمينيسترىنىڭ ورىنباسارى ازات سۇلتانوۆ قازاقستان رەسەي ارقىلى ەۋروپاعا ءبيداي ەكسپورتتاۋ كولەمىن ۇلعايتۋدى جوسپارلاپ وتىرعانىن مالىمدەپ ەدى.
مۇنىمەن بىرگە، بيىل ەلىمىزدە ءبيداي ەگەتىن القاپتاردىڭ كولەمى قىسقارىپ، ونىمدىلىگى جوعارى داقىلدار اۋماعى ارتادى.
