كيىك ەتىن وڭدەۋگە قىتايلىق ينۆەستورلار كەلەتىنى راس پا
باتىس قازاقستان وبلىسىنىڭ اكىمى ناريمان تورەعاليەۆ كيىك ەتى مەن وزگە دە بولىكتەرىن تەرەڭ وڭدەۋيتىن زاۋىت سالۋعا ينۆەستور تارتۋ جۇمىستارى تۋرالى ايتىپ بەردى، دەپ حابارلايدى Kazinform.
«وبلىستا اۋىل شارۋاشىلىعى سالاسىندا، اسىرەسە كيىككە قاتىستى قىتايلىق ينۆەستورلارعا جەر بەرىلەدى دەگەن اقپارات راس پا؟» دەپ سۇرادى استانالىق تىلشىلەر اكىمنەن.
«ءبىز قازىر ينۆەستور ىزدەپ جاتىرمىز. قىتاي بولا ما، باسقا بولا ما، بىزگە ينۆەستور جاقسى شارتپەن كەلسە قابىلدايمىز. ەكى اي بۇرىن قىتايدان ازاماتتار كەلدى، ءوز ويىن ايتتى. جەر تاۋىپ بەرسەڭىزدەر، كيىكتەردى قولعا ۇيرەتىپ، بولاشاقتا ۇلكەن زاۋىت سالىپ، كيىك ەتىن وڭدەۋگە، جالپى مال ەتىن وڭدەۋگە قاتىستى تەرەڭ وڭدەۋ جۇمىسىن قامتيتىن جوسپار بارىن ايتتى. ءبىز ولارعا ءوز شارتىمىزدى قويدىق. جەر تاپقان جاعدايدا بىرىنشىدەن كومپانيا ءبىزدىڭ وبلىسقا تىركەلۋى كەرەك، ياعني سالىق بىزگە ءتۇسۋى كەرەك. جۇمىس ىستەۋگە جەرگىلىكتى حالىق الىنۋى كەرەك جانە ءوز موينىنا العان شارتتارىن ورىنداۋى كەرەك. بۇلار ورىندالماسا، جەردى كەرى قايتارۋ جونىندە الدىن الا ۋاعدالاستىق بولدى. ەگەر ولار ءبىز ايتقان شارتقا كەلىسسە، جۇمىس قولعا الىنادى. ونىڭ قارجى جاعى دا ءالى شەشىلمەگەن» ، - دەدى ن. تورەعاليەۆ استانادا ورتالىق كوممۋنيكاتسيالار قىزمەتىندە.
ءوز جاۋابىندا اكىم ينۆەستور تارتۋدىڭ وتە ماڭىزدى ەكەنىن ايتتى. بۇل سالىق تۇسىمىنە جانە حالىقتى، اسىرەسە جاستاردى جۇمىسپەن قامتۋعا كومەگىن تيگىزەدى.
«تاعى قايتالاپ ايتامىن، جەر (ينۆەستورعا) ۋاقىتشا بەرىلەدى. سونداي- اق زاۋىت سالىنعان جاعدايدا، ول زاۋىتتى كىم بولسا دا ارقالاپ الىپ كەتپەيدى عوي. ول كىمگە پايدالى؟ ەڭ سوڭىندا حالىققا پايدالى، ەلگە پايدالى. ءبىز وسىنى جاقسى ءتۇسىنۋىمىز كەرەك. سوندىقتان قىتاي كەلدى ەكەن دەپ ودان قورقۋدىڭ قاجەتى جوق. ەگەر قىتايدان ينۆەستور كەلىپ، وسىنداي شارۋا ىستەيمىن دەپ جاتسا، ءبىز ونى قابىلدايمىز. قازىر ءىرى قارا جانە جانە باسقا مالدى سويىپ جاتىرمىز. ونىڭ تەرىسىن قايدا جىبەرىپ جاتىرمىز؟ سۇيەگى قايدا جاتىر؟ ەشقايسىسىن وڭدەي المايمىز، پايداعا اسىرا الماي وتىرمىز. كەشە كەلگەن ينۆەستورلارمەن سويلەسكەندە «قانى، تەرىسى، سيراعىنان باستاپ مۇيىزىنە دەيىن سۇيەكتەرى قايتا كەتەدى؟ وسىنىڭ ءبارىن وڭدەيسىزدەر مە؟» دەپ سۇراق قويدىم. ولار ءبارىن وڭدەۋگە دايىن، ياعني سونداي تەحنولوگيا بار. بىزدە ۇلكەن زاۋىتتار سالىنسا، وتە پايدالى بولادى. ءتىپتى مالدىڭ قانىنان مال ازىعىن دايىنداۋعا بولادى ەكەن. سۇيەكتى وڭدەپ، ۇن جاساپ، مال ازىعىنا جىبەرۋگە بولادى. مىنە، وسى مۇمكىندىكتەردى نەگە پايدالانباسقا؟ !»، - دەيدى ب ق و اكىمى.
بۇعان دەيىن ب ق و اكىمى وڭىردەگى كيىك سانىن رەتتەۋ جۇمىستارى قالاي ءجۇرىپ جاتقانىن ايتقان ەدى.
