كيىك سانىن رەتتەۋدىڭ قوسىمشا تاسىلدەرىنە ءتۇرلى زەرتتەۋ جۇرگىزىلىپ جاتىر

«بۇگىنگى تاڭدا كيىك قازاقستانداعى تۇياقتى جانۋارلاردىڭ ەڭ كوپ تارالعان ءتۇرى. سالىستىراتىن بولساق، قازاقستانداعى باسقا تۇياقتى جانۋارلاردىڭ ءبارىنىڭ جالپى سانى 200 مىڭنان اسپايدى»، - دەدى ۇكىمەت باسشىسى جاۋابىندا.

پرەمەر-مينيستر جاۋابىنا قوسىمشا بەرىلگەن انىقتاماعا سايكەس، سانى 2,6 ميلليون بولاتىن كيىكتەن كەيىنگى ەكىنشى ورىنداعى تۇياقتى جانۋار - بۇعىنىڭ سانى 95,5 مىڭ قۇرايدى.

«وسىعان وراي، كيىك سانىن رەتتەۋ ولاردىڭ اۋىل شارۋاشىلىعىنا تەرىس اسەرىن ازايتۋعا، بيولوگيالىق تەپە-تەڭدىكتى ساقتاۋعا جانە ازىقتىن جەتىسپەۋى مەن ەپيزووتيا سالدارىنان جاپپاي قىرىلۋ قاۋپىنىڭ الدىن الۋعا باعىتتالعان. سونىمەن قاتار، وسى جىلدىڭ 10-اقپاننان باستاپ كيىك سانىن رەتتەۋ جونىندەگى ءىس-شارالار توقتاتىلدى. كيىك سانىن رەتتەۋدىڭ قوسىمشا تاسىلدەرىن زەردەلەۋ ماقساتىندا قازىرگى ۋاقىتتا عىلىمي قوعامداستىق ولاردى ورنىقتى پايدالانۋعا، ەپيزوتيالاردىڭ پايدا بولۋ سەبەپتەرىن انىقتاۋعا جانە كيىكتەردىڭ رەسۋرستارىن قورعاۋ جانە پايدالانۋدىڭ ىقتيمال جولدارى بويىنشا شارالار ازىرلەۋگە باعىتتالعان ءتۇرلى زەرتتەۋلەر جۇرگىزۋدە»، - دەدى ولجاس بەكتەنوۆ.

كيىكتەردىڭ كەدەرگىسىز ورىستەۋى ءۇشىن ەكودۋكتار سالۋ ءتيىمسىز.

«كيىكتەردىڭ پوپۋلياتسياسىن رەتتەۋ ماقساتىندا ەكولوگيا جانە تابيعي رەسۋرستار مينيسترلىگى عىلىمي قوعامداستىقپەن بىرلەسىپ، ولاردىڭ سانىن باقىلاۋدىڭ، ونىڭ ىشىندە ەكودۋكتار سالۋ ارقىلى تاريحي ورىستەۋ جولدارىن قالپىنا كەلتىرۋدىڭ بارلىق ىقتيمال تاسىلدەرىن قاراستىردى. ايتالىق، زەرتتەۋ بارىسىندا قىمبات ەكودۋكتار سالۋ كيىك پوپۋلياتسياسىنىڭ سانىنا اسەر ەتپەيتىنى انىقتالدى»، - دەدى ۇكىمەت باسشىسى جاۋابىندا.

ونىڭ اتاپ وتۋىنشە، بۇل شەشىم كيىكتەردىڭ جول ۇستىندەگى ەكودۋكتارمەن جانە جول استىنداعى وتكەلدەرمەن جۇرمەيتىنىمەن عىلىمي نەگىزدەلگەن. ويتكەنى ولار اشىق، تەگىس لاندشافتتاردا تىرشىلىك ەتەدى جانە بيىك قۇرىلىمداردان دا، ءارتۇرلى تۋننەلدەردەن دە قورقادى.

«وسىعان بايلانىستى كيىكتەردىڭ كەدەرگىسىز ورىستەۋى ءۇشىن ەكودۋكتار سالۋ ءتيىمسىز. ويتكەنى بۇل شارالار وڭ ناتيجە بەرمەيدى. ەكودۋكتاردىڭ ورنىنا، عىلىمي ۇيىمداردىڭ ۇسىنىمدارىنا سايكەس، ءتيىستى ەسكەرتۋ بەلگىلەرى مەن قورعاۋ قورشاۋلارىن ورناتا وتىرىپ، كيىكتەر ورىستەيتىن ۋچاسكەلەردە ەڭىس بەتكەيلەر سالۋ جوسپارلانۋدا»، - دەدى ولجاس بەكتەنوۆ.

اۆتور

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى