كيىك اتۋعا موراتوري ۇزارتىلمايدى - كوميتەت وكىلى

بۇل تۋرالى اتالعان كوميتەت ءتوراعاسىنىڭ ورىنباسارى اندرەي كيم ورتالىق كوممۋنيكاتسيالار قىزمەتىندە وتكەن بريفينگىدە ايتتى، دەپ حابارلايدى قازاقپارات.

كوكتەمدە اۋەدەن جۇرگىزىلگەن ساناقتىڭ قورىتىندىسى بويىنشا، ورال پوپۋلياتسياسىنداعى كيىكتەردىڭ سانى 1 ميلليون 130 مىڭعا جەتتى. جالپى قازاقستانداعى كيىك سانى 1 ميلليون 915 مىڭ بولادى. بولجام بويىنشا، جىل اياعىنا دەيىن 2,6 ميلليون باسقا جەتۋى مۇمكىن.

كيىكتىڭ سانى كوپ بولسا، اۋىل شارۋاشىلىعى جانۋارلارلارىنىڭ جايىلىمى مەن سۋاتىنا ورتاقتاسادى، ەگىستى زاقىمدايدى. كەيىنگى ءۇش جىلدا باتىس قازاقستان وبلىسىندا وسىعان بايلانىستى الەۋمەتتىك جاعداي بايقالىپ كەلەدى، - دەدى كوميتەت وكىلى.

سونداي-اق ول بۇل ماسەلەنى حالىقارالىق ساراپشىلار دا زەرتتەگەنىن اتاپ ءوتتى.

بۇعان دەيىن كيىك سانىن قولدان رەتتەۋگە موراتوري قولدانىلىپ كەلدى. كەلەر جىلى سول موراتوريدى سوزۋدىڭ قاجەتى جوق دەپ ەسەپتەيمىز. كيىك سانى قالپىنا كەلتىرىلدى. الەمدەگى كيىكتىڭ %98 قازاقستاندا. بۇل تۋرالى از ايتىلادى. كەرىسىنشە، كيىكتى قۇرتقالى جاتىر دەگەن اڭگىمە كوپ. حالىقارالىق ساراپشىلار كەلىپ، مونعوليا، رەسەي، قازاقستان اۋماعىندا عانا قالعان جانۋارلاردىڭ كورسەتكىشى بويىنشا ءبىزدىڭ ەل اسا جوعارى ناتيجەگە قول جەتكىزگەنىن كوردى. بۇلار مامونتتارمەن ءبىر داۋىردە ءومىر سۇرگەن. كەزىندە ەۋروپا مەن ازياعا تۇگەل تاراعان. قازىر تەك قازاقستان اۋماعىندا شوعىرلانىپ وتىر، - دەدى اندرەي كيم.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى