كۋۆەيت كينوگەرلەرى وزبەكستاندا «ماملۇكتەر تاريحى» اتتى فيلم تۇسىرمەك
تاشكەنت. KAZINFORM - فەرعانا وبلىسى مەن قوقان قالاسىنىڭ اكىمدىگى كۋۆەيتتىك «EblaInternational» كومپانياسىنىڭ باسشىسى حيلال ارناۋت باستاعان دەلەگاتسيانى قابىلدادى، دەپ حابارلايدى ءو ز ا.
تاراپتار 30 بولىمنەن تۇراتىن «ماملۇكتەر تاريحى» فيلمىنىڭ كەيبىر بولىمدەرىن قوقان قالاسىندا ءتۇسىرۋ ماسەلەسىن تالقىلادى. كەزدەسۋدە قوقاننىڭ تۋريستىك الەۋەتىن الەمگە تانىتۋ جانە قالانىڭ تاريحي-مادەني بايلىعىن كورسەتۋ مۇمكىندىكتەرى قاراستىرىلدى. مۇندا تۇسىرىلەتىن «ماملۇكتەر تاريحى» فيلمىنىڭ ءبىر ءبولىمى قوقاننىڭ اسەم ساۋلەتىن، كونە ەسكەرتكىشتەرى مەن مادەني مۇراسىن الەم جۇرتشىلىعىنا تانىستىرۋ ءۇشىن تاماشا الاڭ بولادى دەپ جوسپارلانعان.
- فيلمنىڭ قوقاندا ءتۇسىرىلۋى قالانىڭ الەمدىك تۋريستىك كارتاداعى ورنىن نىعايتۋعا سەپتىگىن تيگىزەدى، - دەدى وبلىس اكىمىنىڭ ورىنباسارى حۋرشيدجون احمەدوۆ.
ءوز كەزەگىندە «EblaInternational» كومپانياسىنىڭ باسشىسى حيلال ارناۋت ءوڭىردىڭ تابيعاتىنا نازار اۋداردى.
- ءبىز فەرعانا وبلىسى اۋماعىنداعى تابيعات، تاۋلار مەن وزەندەردىڭ تاريحي ەسكەرتكىشتەرىمەن ۇيلەسىم تاۋىپ، ماملۇك ءداۋىرىنىڭ لاندشافتتارىن قالپىنا كەلتىرۋدىڭ قولايلىلىعىن بايقادىق. سونىمەن قاتار ەكراندا تارتىمدى كەيىپكەر جاساي الاتىن جەرگىلىكتى اكتەرلەردى تارتامىز، - دەدى حيلال ارناۋت.
«مامليۋكتەر تاريحى» فيلمىنىڭ ءتۇسىرىلىمى وسى جازدا باستالادى.
ەسكە سالا كەتەيىك، ت م د- نىڭ العاشقى حالىقارالىق كينوفەستيۆالى قازاقستاندا وتپەك.
اۆتور
بەگابات ۇزاقوۆ
