ۇكىمەت تىڭايتقىشتاردى سۋبسيديالاۋعا 48 ميلليارد تەڭگەدەن استام قاراجات ءبولدى
استانا. KAZINFORM - ق ر ۇكىمەتىنىڭ رەزەرۆىنەن تىڭايتقىشتاردى (ورگانيكالىق تىڭايتقىشتاردى قوسپاعاندا) سۋبسيديالاۋ ءۇشىن 48,4 ميلليارد تەڭگە ءبولىندى. پرەمەر- مينيستر ولجاس بەكتەنوۆ ءتيىستى قاۋلىعا قول قويدى.
قاۋلى مەملەكەت باسشىسىنىڭ 2024-2028-جىلدارعا ارنالعان اۋىل شارۋاشىلىعى ءونىمىنىڭ جالپى كولەمىن 2 ەسەگە ۇلعايتۋ جانە توپىراققا مينەرالدى تىڭايتقىشتار ەنگىزۋ دەڭگەيىن عىلىمي نەگىزدەلگەن قاجەتتىلىكتىڭ %50 نا دەيىن ارتتىرۋ جونىندەگى تاپسىرمالارىن جۇزەگە اسىرۋ اياسىندا قابىلداندى.
قۇجات تىڭايتقىشتاردىڭ قۇنىن سۋبسيديالاۋعا اعىمداعى نىسانالى ترانسفەرتتەر تۇرىندە اباي، اقمولا، شىعىس قازاقستان، جامبىل، قاراعاندى، قوستاناي، پاۆلودار، سولتۇستىك قازاقستان جانە تۇركىستان وبلىستارىنىڭ اكىمدىكتەرىنە قاراجات اۋدارۋىن كوزدەيدى.
ءبىرىنشى كەزەكتە، قاراجاتتىڭ نەگىزگى كولەمى مينەرالدى تىڭايتقىشتاردى اۆانستىق سۋبسيديالاۋ تەتىگىن ىسكە اسىرۋعا باعىتتالعان.
وتكەن جىلدىڭ ناۋرىز ايىندا ا و ك- ءنى قولداۋ شەڭبەرىندە تىڭايتقىشتاردى اۆانستىق سۋبسيديالاۋ تەتىگى ەنگىزىلگەنى بەلگىلى. بۇل رەتتە بيۋدجەتتىك سۋبسيديالار اۋىل شارۋاشىلىعى تاۋارىن وندىرۋشىلەرگە ارزانداتىلعان تىڭايتقىشتاردى جەتكىزۋ ءۇشىن وتاندىق زاۋىتتاردىڭ ارنايى شوتتارىنا الدىن الا اۋدارىلادى.
قابىلدانعان شارالار ەسەبىنەن العاش رەت تىڭايتقىشتاردى قولدانۋ دەڭگەيى عىلىمي نەگىزدەلگەن قاجەتتىلىكتىڭ %40 نا جەتتى (2024-جىلعا دەيىن %21 دان اسپاعان).
كوكتەمگى ەگىس جۇمىستارىنا دايىندىق كەزەڭىندە ۇكىمەتتىڭ ۋاقتىلى قارجىلىق قولداۋى اۋىل شارۋاشىلىعى تاۋار وندىرۋشىلەرىن تىڭايتقىشتارمەن ۋاقتىلى قامتاماسىز ەتۋگە مۇمكىندىك بەرەدى، بۇل سايىپ كەلگەندە جوعارى ءارى ساپالى ءونىم الۋعا مۇمكىندىك بەرەدى.
