ۇكىمەت ق ق س مولشەرلەمەسىنە قاتىستى جاڭا ۇسىنىس ايتتى

استانادا ق ر قارجى ءمينيسترى ءمادي تاكيەۆ پەن ۇلتتىق ەكونوميكا ۆيتسە-ءمينيسترى ازامات ءامرين بيزنەس وكىلدەرىمەن سالىق رەفورماسى شەڭبەرىندە ق ق س سارالانعان مولشەرلەمەلەرىن بەلگىلەۋ جونىندەگى ۇكىمەت ۇسىنىستارىن تالقىلادى.

كەزدەسۋ «اتامەكەن» ۇ ك پ قولداۋىمەن ۇيىمداستىرىلدى، وعان بيزنەستىڭ، قاۋىمداستىقتاردىڭ، قوعامدىق جانە سالالىق بىرلەستىكتەردىڭ 150 دەن استام وكىلى قاتىستى. ولاردىڭ قاتارىندا قازاقستاندىق سالىق كەڭەسشىلەرى قاۋىمداستىعىنىڭ، ءوزىن-ءوزى رەتتەيتىن قوعامدىق تاماقتاندىرۋ ۇيىمىنىڭ وكىلدەرى، استانا كاسىپكەرلەر پالاتاسىنىڭ وڭىرلىك كەڭەستەرىنىڭ جانە وڭدەۋ جانە فارماتسيەۆتيكا، مەديتسينا ونەركاسىبى كوميتەتتەرىنىڭ، «اتامەكەن» ۇ ك پ، «Alageum Electric» كومپانيالار توبىنىڭ، «Petro mining» قاۋىمداستىعىنىڭ مۇشەلەرى جانە باسقالار بار.

- مەملەكەت باسشىسى قاسىم-جومارت توقايەۆ سالىق جۇيەسى تەڭگەرىمدى بولۋى ءتيىس ەكەنىن اتاپ كورسەتتى. بۇل ناقتى نۇسقاۋ بولدى. ول بيزنەس پەن مەملەكەتتىڭ مۇددەلەرىن ەسكەرۋى كەرەك. بۇگىن ءبىز باستى ماسەلەلەردىڭ ءبىرىن تالقىلاۋ ءۇشىن جينالدىق، بۇل قوسىلعان قۇن سالىعىنا قاتىستى. ءبىز وڭىرلەردە ەكونوميكا، قارجى مينيسترلىكتەرىنىڭ، «اتامەكەن» پالاتاسىنىڭ وكىلدەرى قاتىساتىن كوپتەگەن كەزدەسۋ وتكىزەمىز. جۇمىس ۇلكەن جانە جان- جاقتى. ءبىزدىڭ مەكەنجايىمىزعا كەلىپ تۇسكەن بارلىق ۇسىنىس تىڭدالادى. ءبىز ءبىرىڭعاي ۇستانىمدى قالىپتاستىرامىز، ويتكەنى سالىق كودەكسى وتە قاراپايىم، تۇسىنىكتى، ناقتى بولۋى ءتيىس»، - دەپ اتاپ ءوتتى ءمادي تاكيەۆ.

ق ق س - بۇل بيۋجەتتى تولىقتىرۋدىڭ نەگىزگى كوزدەرىنىڭ ءبىرى. ق ق س مولشەرلەمەسىن ارتتىرۋ جانە سارالاۋ بيۋجەتتىڭ مۇنايدان تۇسەتىن وزگەرمەلى كىرىستەرىنە تاۋەلدىلىگىن ازايتۋعا جانە مەملەكەتتىك باسىم جوبالاردى قارجىلاندىرۋعا مۇمكىندىك بەرەدى.

ءوز كەزەگىندە ۇلتتىق ەكونوميكا ۆيتسە-ءمينيسترى ازامات ءامرين سالىق رەفورماسى شەڭبەرىندە ق ق س سارالانعان مولشەرلەمەلەرىن بەلگىلەۋ جونىندەگى ۇكىمەتتىڭ ۇسىنىستارىن ايتتى.

- ءبىز مىناداي تەتىكتى قاراستىرۋدى ۇسىنامىز: جالپى بەلگىلەنگەن ق ق س مولشەرلەمەسى 16 پايىز، اۋىل شارۋاشىلىعى ونىمدەرىن وندىرۋشىلەردى ق ق س- تان تولىق بوساتۋ، ال ءبىرقاتار سالالار ءۇشىن - 10 پايىز مولشەرىندەگى ارالىق مولشەرلەمە. وسىلايشا، ۇكىمەت ۇسىنىپ وتىرعان مولشەرلەمەلەردى سارالاۋ: 16 پايىز، 10 پايىز، 0 پايىز جانە بوساتۋ، - دەپ ءتۇسىندىردى ازامات ءامرين.

قازىرگى ۋاقىتتا اگرارلىق سەكتوردا شارۋا قوجالىقتارى ق ق س تولەمەيتىنى، ال زاڭدى تۇلعالار قولدا بار جەڭىلدىكتەرگە بايلانىستى بيۋدجەتكە تولەۋگە ءتيىستى سالىقتاردىڭ تەك 30 پايىزىن تولەيتىنى اتاپ ءوتىلدى. جاڭا تەتىكتەر بويىنشا ولاردىڭ ەشقايسىسى ق ق س تولەمەيتىن بولادى. بۇل قازاقستاندىق اۋىل شارۋاشىلىعى ونىمدەرىن (كارتوپ، قىزاناق، پياز جانە باسقالارى) باسەكەگە قابىلەتتى ەتۋگە مۇمكىندىك بەرەدى. 10 پايىز مولشەرلەمە قولدانىلاتىن سالالاردىڭ تۇرلەرى بيزنەسپەن ءالى دە تالقىلانۋدا.

سونداي-اق كەزدەسۋدە جەڭىلدەتىلگەن دەكلاراتسيا مەن بولشەك سالىق رەجيمىن، ونىڭ ءمانى - كىرىس شەگىن جىلىنا 600 مىڭ ا ە ك (2 ميلليارد 359 ميلليون تەڭگە) مولشەرىندە ساقتاي وتىرىپ، قايتا قاراۋ بويىنشا ۇسىنىستار ايتىلدى. نەگىزگى وزگەرىس - بۇل رەجيمدى تەك B2C سەگمەنتىندە (بولشەك ساۋدادا) جۇزەگە اسىرۋ. جۇمىسشىلار سانى بويىنشا شەكتەۋدى الىپ تاستاۋ ۇسىنىلدى. كاسىپكەردىڭ ساتۋدان تۇسكەن تابىسى جىلىنا 100 ميلليون تەڭگەدەن اساتىن بولسا، سالىق سالىناتىن تابىستى ەڭبەكاقى قورى (ەڭبەكاقى تولەۋ قورى) سوماسىنا ازايتۋ مۇمكىندىگى كوزدەلگەن. وسىلايشا، 100 ميلليون تەڭگە شەگى جالاقىنى اقتاۋعا ىنتالاندىرۋعا مۇمكىندىك بەرەدى. بۇل رەتتە بولشەك سالىقتىڭ 4 پايىز مولشەرلەمەسى ء(ماسليحاتتاردىڭ 50 پايىزعا تومەندەتۋ مۇمكىندىگىمەن) ساقتالادى.

سالىق رەفورماسىن ىسكە اسىرۋ كەزىندە ەل بيۋجەتىنە تۇسەتىن سالىق تۇسىمدەرى جىل سايىن 4-5 تريلليون تەڭگەگە ارتادى دەپ كۇتىلەدى. بۇل قاراجات ۇلتتىق قورعا تاۋەلدىلىكتى ازايتۋعا؛ مەملەكەتتىك قارىز دەڭگەيىن تومەندەتۋ جانە ينۆەستيتسيالىق جوبالاردى نەسيەلەۋگە، دامۋ ينستيتۋتتارىن نىعايتۋعا، تۇرعىن-ءۇي كوممۋنالدىق شارۋاشىلىقتى، جىلۋ-ەنەرگەتيكا جۇيەسىن جاڭعىرتۋعا قوسىمشا رەسۋرستاردى باعىتتاۋعا كومەكتەسەدى.

ەسكە سالساق، مەملەكەت باسشىسى وتاندىق بيزنەس وكىلدەرىمەن كەزدەسۋىندە قوسىلعان قۇن سالىعىنىڭ مولشەرلەمەسى سارالانىپ بەلگىلەنۋگە ءتيىس ەكەنىن اتاپ وتكەن بولاتىن.

پرەمەر-ءمينيستردىڭ ورىنباسارى - ۇلتتىق ەكونوميكا مينيسترى سەرىك جۇمانعارين قوسىمشا قۇن سالىعى شەگىن نەلىكتەن كوتەرۋ قاجەت ەكەنىن ءتۇسىندىردى.

كەيىننەن جۇمانعارين ق ق س- تى كوتەرۋ كىمدەرگە قاتىستى بولمايتىنىن ناقتىلادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى