ۇكىمەت پەن اكىمدەر مەملەكەت باسشىسىنىڭ ءتيىستى نۇسقاۋلارىن، تاپسىرمالارىن مۇلتىكسىز ورىنداۋعا مىندەتتى - توقايەۆ
ەكونوميكالىق وزگەرىستەردىڭ يگىلىگىن جاقىن ارادا ەلىمىزدىڭ بارلىق ازاماتى كورۋگە ءتيىس. بۇل تۋرالى اقوردادا رەسپۋبليكا كۇنىنە وراي ءبىرقاتار ازاماتقا مەملەكەتتىك ناگرادالار مەن سىيلىقتار تاپسىرۋعا ارنالعان سالتاناتتى راسىمدە مەملەكەت باسشىسى قاسىم- جومارت توقايەۆ ايتتى، دەپ حابارلايدى Kazinform.
«بارشاڭىزعا ءمالىم، مەن بيىلعى جولداۋىمدا ەلىمىزدىڭ جاڭا ەكونوميكالىق باعدارىن ۇسىندىم. باستى قاعيداتتارىمىز ادىلدىك، اشىقتىق جانە شىنايى باسەكە بولماق. ياعني، ءبىز قازىر جاڭا ەكونوميكالىق ساياساتقا جول اشىپ وتىرمىز. نەگىزگى ماقسات - ۇلت بايلىعىن ءادىل ءبولۋ، ينفراقۇرىلىمدى جەدەل جاڭعىرتۋ، كاسىپكەرلىككە قولداۋ كورسەتۋ جانە ەلىمىزگە اۋقىمدى ينۆەستيتسيا تارتۋ. ۇكىمەت پەن اكىمدەر مەملەكەت باسشىسىنىڭ ءتيىستى نۇسقاۋلارىن، تاپسىرمالارىن مۇلتىكسىز ورىنداۋعا مىندەتتى. بۇل جۇمىس پارلامەنتتىڭ ءجىتى باقىلاۋىندا بولۋى كەرەك. ءبىر سوزبەن ايتقاندا، ەكونوميكالىق وزگەرىستەردىڭ يگىلىگىن جاقىن ارادا ەلىمىزدىڭ بارلىق ازاماتى كورۋگە ءتيىس»، - دەدى قاسىم- جومارت توقايەۆ.
مەملەكەت باسشىسى قازاقستان ەگەمەن مەملەكەت رەتىندە ءاردايىم ۇلتتىق مۇددەسىنە ساي كەلەتىن سالماقتى ءارى سىندارلى سىرتقى ساياسات جۇرگىزەتىندىگىن باسا ايتتى.
«حالىقارالىق قاۋىپسىزدىكتى قامتاماسىز ەتۋدى كوزدەيتىن ايماقتىق جانە جاھاندىق ۇدەرىستەردە ماڭىزدى ءرول اتقارادى. ءبىز الەمدىك دىندەردىڭ ءبىر بىرىمەن جاقىنداسىپ، سىندارلى ديالوگ ورناتۋىنا كۇش سالامىز. قازىرگى زاماندا مەملەكەتتەردىڭ ۇجىمداسىپ كۇش جۇمىلدىرۋى جانە ديپلوماتيانى دانالىقپەن ءارى جوعارى كاسىبيلىكپەن جۇرگىزۋى الەمدە ۇزاق ۋاقىت بويى تۇراقتىلىق ورناۋىنا، ەلدەردىڭ جاپپاي دامۋىنا، ب ۇ ۇ- نىڭ جارعىسىنا نەگىزدەلگەن ادىلەتتى حالىقارالىق قاتىناستار جۇيەسى قۇرىلۋىنا جول اشادى. قازاقستان «ەلدىڭ ىشىندە دە، اينالاسىندا دا بەيبىتشىلىك»، «ءارالۋاندىق ارقىلى - بىرلىككە» دەگەن قاعيداتتاردى ءاردايىم بەرىك ۇستانادى»، - دەدى پرەزيدەنت.
اۆتور
مارلان جيەمباي
