ۇكىمەت دارىگەرلەردى وڭىرگە بارۋعا ىنتالاندىراتىن جاڭا ادىستەر ازىرلەمەك
دارىگەرلەردىڭ وڭىرلەرگە بارىپ جۇمىس ىستەۋىن ىنتالاندىراتىن جاڭا ادىستەر ازىرلەۋ كەرەك. بۇل تۋرالى ۇكىمەت وتىرىسىندا پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«ءتيىستى كادرلارمەن، ءبىرىنشى كەزەكتە اسا قاجەت ماماندارمەن قامتاماسىز ەتۋ ءۇشىن مەديتسينالىق ۋنيۆەرسيتەتتەر جانە كوللەدج تۇلەكتەرىمەن بىرگە تاجىريبەلى مامانداردى دا وڭىرلەرگە، اسىرەسە اۋىلدىق جەرلەرگە تارتۋ ماسەلەسىن پىسىقتاۋ قاجەت. كورىپ وتىرعانىمىزداي، جۇمىستار ءالى دە جەتكىلىكسىز. ىنتالاندىرۋدىڭ جاڭا ادىستەرىن ازىرلەۋ كەرەك»، - دەدى پرەمەر- مينيستر.
ءاليحان سمايىلوۆتىڭ دەرەگىنشە، دەنساۋلىق ساقتاۋ وبەكتىلەرىن مەديتسينالىق جابدىقتارمەن قامتاماسىز ەتۋ كورسەتكىشى 84 پايىز قۇرايدى. ولاردىڭ جارتىسىنان كوبى توزعان. سوندىقتان ۋاقتىلى جانە ساپالى مەديتسينالىق كومەك كورسەتۋ ءۇشىن ءوڭىر اكىمدىكتەرى مەديتسينالىق- سانيتاريالىق العاشقى كومەك وبەكتىلەرىن قولدانىستاعى نورماتيۆتەرگە سايكەس جابدىقتاۋى قاجەت.
«دەنساۋلىق ساقتاۋ سالاسىن تسيفرلاندىرۋ جۇمىستارىن كۇشەيتۋ كەرەك. بۇل رەتتە، مەديتسينالىق- سانيتاريالىق العاشقى كومەك وبەكتىلەرىنە ەرەكشە كوڭىل ءبولۋ قاجەت. ءوڭىر اكىمدىكتەرى تسيفرلاندىرۋ مينيسترلىگىمەن بىرلەسىپ، اۋداندىق دەڭگەيدەن تومەن دەنساۋلىق ساقتاۋ ۇيىمدارىن جوعارى جىلدامدىقتى ينتەرنەتكە قوسۋ پروتسەسىن تەزدەتۋى ءتيىس»، - دەدى ۇكىمەت باسشىسى.
پرەمەر-مينيستر قاجەتتى كونسۋلتاتسيانى جەدەل الۋ ءۇشىن تەلەمەديتسينا مەن قاشىقتان قىزمەت كورسەتۋدى اۋىلدارعا دەيىن جەتكىزۋ قاجەتتىگىنە توقتالدى.
«اتالعان ءىس-شارالار تۇرعىلىقتى جەرى بويىنشا مەديتسينالىق قىزمەتتەردىڭ قولجەتىمدى بولۋىن قامتاماسىز ەتۋ تۋرالى مەملەكەت باسشىسىنىڭ تاپسىرماسىن ىسكە اسىرۋعا مۇمكىندىك بەرەدى»، - دەدى ءاليحان سمايىلوۆ.
