ۇكىمەت باسشىسى: سۋ تاسقىنىنان زارداپ شەككەندەردىڭ ەشقايسىسى نازاردان تىس قالمايدى
استانا. KAZINFORM - ۇكىمەت وتىرىسىندا پرەمەر-مينيستر ولجاس بەكتەنوۆ 2025-2029 -جىلدارعا ارنالعان سۋ تاسقىنىنىڭ الدىن الۋ جوسپارىن ازىرلەۋدى تاپسىردى.
«توتەنشە جاعدايلار مينيسترلىگى قورعانىس، ىشكى ىستەر مينيسترلىكتەرىمەن جانە اكىمدىكتەرمەن بىرلەسىپ، ادامداردىڭ قاۋىپسىزدىگىن قامتاماسىز ەتۋ جونىندە قاجەتتى شارالار قابىلداسىن. قازىرگى جاعدايدا ەڭ ماڭىزدىسى - ازاماتتارىمىزدىڭ ءومىرى. قاجەت بولعان جەردە ەۆاكۋاتسيالاۋ جۇمىستارىن الدىن الا جۇرگىزۋ كەرەك»، - دەدى ۇكىمەت باسشىسى.
ولجاس بەكتەنوۆ سونىمەن قاتار توتەنشە جاعدايلار مينيسترلىگىنە اكىمدىكتەرمەن جانە باسقا دا كۇشتىك قۇرىلىمدارمەن بىرلەسىپ، سۋ باسقان ەلدى- مەكەندەردە اۆاريالىق- قۇتقارۋ جانە كەزەك كۇتتىرمەس شۇعىل جۇمىستاردى جۇرگىزۋ ءۇشىن كۇشتەر مەن قۇرالداردىڭ جەتكىلىكتى كولەمىن قامتاماسىز ەتۋدى تاپسىردى.
«اكىمدىكتەر اقتوبە، باتىس قازاقستان جانە قوستاناي وبلىستارىندا بولعان سۋ تاسقىنىنا نازار اۋدارا وتىرىپ، ەلىمىزدىڭ سولتۇستىك، شىعىس جانە ورتالىق وڭىرلەرىندە سۋ باسىپ كەتپەۋى ءۇشىن ناقتى شارالار قابىلداسىن. قاتەلىكتەردەن ساباق الىپ، جۇمىستى جاڭادان ءتيىمدى ەتىپ ۇيىمداستىرۋ قاجەت. بۇل رەتتە، جۇرگىزىلىپ جاتقان ءىس- شارالار تۋرالى حالىقتى دەر كەزىندە حاباردار ەتىپ وتىرۋ ماڭىزدى. اۋقىمدى سۋ تاسقىنىنا الىپ كەلگەن سەبەپتەردى انىقتاپ، ولاردى جويۋ جونىندە ۇسىنىستارمەن بىرگە قالىپتاسقان جاعدايعا تولىق تالداۋ جۇرگىزۋ قاجەت. ءاربىر ءوڭىر گەوگرافيالىق جانە اۋا رايىنىڭ ەرەكشەلىكتەرىن ەسكەرە وتىرىپ، ءىس- شارالار جوسپارىن قايتا قاراۋى كەرەك. وسىعان بايلانىستى توتەنشە جاعدايلار مينيسترلىگىنە مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ، 2025-2029 -جىلدارعا ارنالعان سۋ تاسقىنىنىڭ الدىن الۋ جوسپارىن ازىرلەۋدى تاپسىرامىن. بۇل جۇمىسقا تاجىريبەلى سالالىق ساراپشىلاردى تارتۋ كەرەك»، - دەدى ول.
پرەمەر- مينيستر توتەنشە جاعدايلار، ۇلتتىق ەكونوميكا، قارجى، كولىك، قۇرىلىس، سۋ رەسۋرستارى مينيسترلىكتەرى مەن ءوڭىر اكىمدىكتەرى تەز ارادا اپاتتان كەلگەن شىعىن كولەمىن باعالاپ، زارداپ شەككەن ادامدارعا ماتەريالدىق كومەك كورسەتۋگە كىرىسۋى تيىستىگىن باسا ايتتى.
«اكىمدىكتەر جەرگىلىكتى جەرلەردە زارداپ شەككەن تۇرعىنداردى شىعىندى وتەۋ الگوريتمى جانە ءۇي سالۋ ءۇشىن كورسەتىلەتىن كومەك تۋرالى اتاۋلى تۇردە حاباردار ەتۋگە ءتيىس. زارداپ شەككەندەردىڭ ەشقايسىسى نازاردان تىس قالمايدى. بارىنە كومەك بەرىلەتىن بولادى»، - دەدى ولجاس بەكتەنوۆ.
اۆتور
مارلان جيەمباي
