ۇكىمەت 2024 -جىلى 16 زاڭ جوباسىن ازىرلەيدى
ۇكىمەت 2024 -جىلعا ارنالعان زاڭ جوبالاۋ جۇمىستارى جوسپارىن ماقۇلدادى، دەپ حابارلايدى Kazinform.
«ادىلەت مينيسترلىگى مەملەكەت باسشىسىنىڭ، ۇكىمەت باسشىلىعىنىڭ تاپسىرمالارى، ستراتەگيالىق قۇجاتتار، مەملەكەتتىك ورگانداردىڭ ۇسىنىستارى نەگىزىندە ۇكىمەتتىڭ 2024 -جىلعا ارنالعان زاڭ جوبالاۋ جۇمىستارى جوسپارىنىڭ جوباسىن دايىندادى. جوسپار جوباسىمەن 2024 -جىلى تسيفرلىق تەحنولوگيالاردى، الەۋمەتتىك سالانى، زياتكەرلىك مەنشىك سالاسىن، يننوۆاتسيالىق قىزمەتتى، عارىش سالاسىن جانە باسقا دا سالالاردى دامىتۋ سياقتى وزەكتى باعىتتار بويىنشا 16 زاڭ جوباسىن ازىرلەۋ كوزدەلگەن. جوسپارلانعان 16 زاڭ جوباسىنىڭ ىشىنەن 2 زاڭ جوباسى بۇرىن رەتتەلمەگەن قوعامدىق قاتىناستاردى رەگلامەنتتەۋگە باعىتتالاتىن بولادى. اتاپ ايتقاندا، «Digital Bridge 2023» فورۋمىندا سويلەگەن سوزىندە مەملەكەت باسشىسى الەمدىك وزىق تاجىريبەگە جاۋاپ بەرەتىن، نارىقتىڭ قاجەتتىلىكتەرىن دە، ازاماتتاردىڭ مۇددەسىن دە ەسكەرەتىن، زاماناۋي قۇقىقتىق رەتتەۋشى بازانى، ونىڭ ىشىندە تسيفرلىق كودەكس جوباسىن دا ازىرلەۋ جونىندە اۋقىمدى مىندەت قويدى»، - دەدى مينيستر بۇگىن ۇكىمەت وتىرىسىندا.
ونىڭ اتاپ وتۋىنشە، ۋاقىت تالاپتارىنا سايكەس ءبىلىم جانە عىلىم سالاسىن دامىتۋ جانە ۋنيۆەرسيتەتتەردى تۇراقتى قارجىلاندىرۋدى قامتاماسىز ەتۋ ماقساتىندا نىسانالى كاپيتال قورى تۋرالى زاڭ جوباسىن ازىرلەۋ ۇسىنىلادى. زاڭ جوباسىن قابىلداۋ قوعامدىق قاتىناستاردى رەتتەۋگە جانە نىسانالى كاپيتال قورلارى سالاسىنداعى مەملەكەتتىك ساياساتتىڭ قۇقىقتىق نەگىزدەرىن بەلگىلەۋگە، سونداي-اق ولاردىڭ قىزمەتى مەن ۇيىمداستىرىلۋىنىڭ ناقتى جۇيەسىن قۇرۋعا مۇمكىندىك بەرەدى.
«ءبىرقاتار زاڭ جوباسى 2030 -جىلعا دەيىنگى قۇقىقتىق ساياسات تۇجىرىمداماسىنان تۋىندايدى. بۇل - جەر قويناۋىن پايدالانۋ جانە نورماشىعارۋ سالاسى ماسەلەلەرى جونىندەگى زاڭنامانى جەتىلدىرۋ. ءوز كەزەگىندە قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا زاڭ جوباسىن ازىرلەۋ قارجىلىق مونيتورينگتى دامىتۋدىڭ 2022-2026 -جىلدارعا ارنالعان تۇجىرىمداماسىنان تۋىنداپ وتىر»، - دەدى ازامات ەسقارايەۆ.
بۇدان باسقا، مينيستر جوسپاردىڭ جوباسى رەسپۋبليكالىق بيۋدجەت جانە ۇلتتىق قوردان كەپىلدەندىرىلگەن ترانسفەرت تۋرالى جىل سايىنعى نەگىزدە ازىرلەنەتىن زاڭ جوبالارىن كوزدەيتىندىگىن ايتادى.
«وسىلايشا، جوسپار جوباسى مەملەكەتتىك رەتتەۋدىڭ وزەكتى مىندەتتەرىن شەشۋ ءۇشىن قاجەتتى زاڭ جوبالارىن قامتيدى جانە مەملەكەت دامۋىنىڭ ساياسي باعىتىمەن سايكەس كەلەدى. جوسپار جوباسى بارلىق مۇددەلى مەملەكەتتىك ورگاندارمەن كەلىسىلدى. «قۇقىقتىق اكتىلەر تۋرالى» زاڭعا سايكەس جوسپاردىڭ جوباسىن مەملەكەت باسشىسىمەن كەلىسۋگە جىبەرۋ ۇسىنىلادى»، - دەدى ول.
