كىمدەرگە اش قارىنعا سۋ ىشۋگە بولمايدى؟

قانداي جاعدايدا اش قارىنعا سۋ ىشۋگە بولمايتىنىن گاستروەنتەرولوگ رۋستەم سادىكوۆ ايتىپ بەردى، - دەپ حابارلايدى Massaget.kz ءتىلشىسى «دوكتور پيتەر» گە سىلتەمە جاساپ.

ەرەسەك ادام ءۇشىن دەنساۋلىق فورمۋلاسىنىڭ ءبىرى مىناداي: دەنە ماسساسىنىڭ 1 كيلوگرامىنا 30 م ل سۋ. قىستا دا ادام اعزاسىنا جەتكىلىكتى سۋ مولشەرى قاجەت. سەبەبى سۇيىقتىقتىڭ جەتىسپەۋى ج ر ۆ ي- مەن اۋىرۋ قاۋپىن ارتتىرادى: تىنىس الۋ شىرىشتىسى قۇرعاپ كەتسە، ول ۆيرۋستاردان ناشار قورعايتىن بولادى.

وعان قوسا، سۋ اعزاداعى ۋىتتاردى شىعارادى جانە تەرى جاعدايىن جاقسارتادى. سونداي-اق ادام سۋ كوپ ىشكەن كەزدە ول اشتىق سەزىمىن باسىپ تاستايدى. سوندىقتان تولىققاندى سۋ رەجيمى ارىقتاۋعا كومەكتەسەدى. ءبىراق سۋدى قالاي دۇرىس ءىشۋ كەرەك؟ ونى تاماقتان كەيىن الدە اش قارىنعا ىشكەن دۇرىس پا؟

ءتۇنى بويى ادامنىڭ دەنەسى جانە تەرىسى سۋدىڭ كوپ مولشەرىن بۋعا اينالدىرادى. ناتيجەسىندە، تاڭەرتەڭ اعزا سۋ جەتىسپەۋشىلىگىنەن قينالادى، ال ول جۇرەك پروبلەمالارىنا اكەلۋى مۇمكىن.

«مۇنداي جاعدايدا جۇرەك قويۋلاۋ قاندى اينالدىرۋ كەرەك بولادى، ال ول جۇرەك بۇلشىقەتىنە ۇلكەن كۇش تۇسىرەدى. قاندى سۇيىلتۋ ءۇشىن تاڭەرتەڭ 500 م ل جىلى سۋ ءىشۋدى ۇسىنامىن»، - دەيدى دارىگەر.

وعان قوسا، جىلى سۋ ءوت جولدارىنىڭ سپازمىن كەتىرۋگە، ءوتتىڭ جانە اسقازان ءسولىنىڭ جاقسى وڭدەلۋىنە كومەكتەسەدى. سول ءۇشىن تاڭعى اس الدىندا ەكى ستاقان جىلى سۋ ىشسەڭىز، كۇنى بويى اس جاقسى قورىتىلادى.

الايدا كەي ادامدار ءۇشىن بۇل ريتۋال زيان بولۋى مۇمكىن.

«اش قارىنعا ىشىلگەن سۋ قاندى جىلدام سۇيىلتادى. بۇل بۇيرەك پروبلەماسى، گيپەرتونيا (جوعارى قان قىسىمى) جانە ءوت-تاس اۋرۋى كەزىندە اسقىنۋلارعا اكەلۋى مۇمكىن. مۇنداي جاعدايدا كۇندەلىكتى سۇيىقتىق نورماسىن ءوزىڭىزدىڭ دارىگەرىڭىزبەن كەڭەسۋىڭىز كەرەك»، - دەيدى رۋستەم سادىكوۆ.

دارىگەردىڭ ايتۋىنشا، سۋدىڭ تەمپەراتۋراسى مەن ونى ءىشۋ ۋاقىتى عانا ەمەس، سونداي-اق ونى قانداي قالىپتا ىشەتىنىڭىز دە ماڭىزدى.

«سۋ جاقسى ءسىڭۋى ءۇشىن ونى وتىرىپ ءىشۋ كەرەك. سۋدى تۇرىپ ىشكەن كەزدە ول اعزاداعى سۇيىقتىقتىڭ تەپە-تەڭدىگىن بۇزىپ، ءارتريتتىڭ دامۋىنا اكەلۋى مۇمكىن»، - دەيدى گاستروەنتەرولوگ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى