ەكىباستۇزدا WhatsApp ارقىلى جۇرتتى بايىتامىن دەپ الداعان الاياق ايەل سوتتالدى
پاۆلودار. KAZINFORM - ول ءوزى قۇرعان الاياقتىق سحەماسى بويىنشا 23 ادامدى الداپ، جالپى سوماسى 26 ميلليون تەڭگەدەن استام ماتەريالدىق شىعىن كەلتىرگەن.
ەكىباستۇزدىق تۇرعىن تەز ءارى وڭاي بايۋدىڭ جولدارىن ىزدەپ، وزگەلەردىڭ ەسەبىنەن اقشا تابۋدى ۇيعارعان. ونىڭ قاراجاتتى كوبەيتۋ جوبالارىنا قاتىسۋ تاجىريبەسى بۇرىننان بولعان. 2020 -جىلى ايەل ادام WhatsApp مەسسەندجەرىندە «LiveStyler»، «قارلىعاش»، «ۋمنوجايكا»، «شانس» جانە ت. ب. چاتتارىن قۇرىپ، ادامداردى پايدا تابۋ ءۇشىن اقشا سالۋعا شاقىرعان.
- ول ءوزى قۇرعان سحەمانىڭ تابىستىلىعىنىڭ كورىنىسىن جاساۋ ءۇشىن قاتىسۋشىلارعا جاڭا قاتىسۋشىلار ەسەبىنەن «ديۆيدەندتەر» تولەگەن. قالعانىن جەكە قاجەتتىلىگىنە جۇمساعان. ماسەلەن، جابىرلەنۋشىنىڭ ءبىرى اقشاسىن كوبەيتەمىن دەگەن ۋادەگە سەنىپ، «LiveStyler» توبىنا قوسىلعان. ۇيىمداستىرۋشىنىڭ قىلمىستىق نيەتىنەن بەيحابار ول 2021 -جىلدىڭ قاڭتار- قاراشا ايلارى ارالىعىندا الاياق ايەل كورسەتكەن ەسەپشوتقا (ونىڭ وزىنە، كامەلەتكە تولماعان ۇلىنا جانە ونىڭ كۇيەۋىنە تيەسىلى) 14 ميلليون تەڭگەگە جۋىق اقشا اۋدارعان. بۇل سومانىڭ 8,5 ميلليون تەڭگەسىن قاسكۇنەم جابىرلەنۋشىگە ادالدىق تانىتۋ ءۇشىن قايتارىپ بەرگەن. قالعان 5,4 ميلليون تەڭگەنى ءوزى يەمدەنگەن. قىلمىستىق ارەكەتتەر ناتيجەسىندە 23 جابىرلەنۋشىگە جالپى سوماسى 26 ميلليون تەڭگەدەن استام ماتەريالدىق شىعىن كەلتىرىلگەن، - دەپ حابارلاردى پاۆلودار وبلىستىق سوتىنىڭ باسپا ءسوز قىزمەتىنەن.
سوت سوتتالۋشىنىڭ قىلمىستىق جاۋاپكەرشىلىككە العاش رەت تارتىلىپ وتىرعانىن، قامقورلىعىندا كامەلەتكە تولماعان بالاسى بار ەكەنىن جانە اۋىرلاتاتىن ءمان- جايلاردىڭ جوقتىعىن ەسكەرە وتىرىپ، وعان 4 جىلعا باس بوستاندىعىنان شەكتەۋ جازاسىن تاعايىندادى. سونداي-اق جابىرلەنۋشىلەر پايداسىنا 26 ميلليون تەڭگە ماتەريالدىق شىعىن ءوندىرىلدى. جازانى وتەۋدەن قاساقانا جالتارعان جاعدايدا باس بوستاندىعىن شەكتەۋ باس بوستاندىعىنان ايىرۋمەن اۋىستىرىلادى.
ەسكە سالا كەتەيىك، پاۆلودار قالاسىندا پوليتسيا قىزمەتكەرلەرى تەلەفون الاياقتارىنا كومەكتەسكەن وتباسىلىق جۇپتى ۇستادى.
