ەكى ميللياردقا جۋىق تەڭگە جىمقىرىپ، سوتتالعان رەكتوردىڭ جازاسى جەڭىلدەمەيتىن بولدى
الماتى وبلىستىق سوتى حالىقارالىق اقپاراتتىق تەحنولوگيالار ۋنيۆەرسيتەتىنىڭ بۇرىنعى رەكتورى دامير شىنىبەكوۆكە قاتىستى پروكۋروردىڭ جەكە ءوتىنىشىن قارادى، دەپ حابارلايدى Kazinform.
اپەللياتسيالىق ينستانتسيا شىنىبەكوۆتى ەڭ تومەنگى قاۋىپسىزدىك مەكەمەسىنە اۋىستىرۋ تۋرالى سوت ۇكىمنىڭ كۇشىن جويىپ، پروكۋروردىڭ جەكە ءوتىنىشى قاناعاتتاندىرىلدى.
«سوت قاۋلىسى ورىنداۋ ءۇشىن الماتى قالاسى، الماتى جانە جەتىسۋ وبلىستارى بويىنشا قىلمىستىق اتقارۋ جۇيەسى دەپارتامەنتىنە جولداندى»، - دەپ حابارلادى الماتى وبلىستىق سوتىنىڭ باسپا ءسوز قىزمەتىنەن.
ەسكە سالايىق، 2020 -جىلى №2-بوستاندىق اۋداندىق سوتى ۋنيۆەرسيتەتتىڭ بۇرىنعى رەكتورى دامير شىنىبەكوۆ پەن بۇرىنعى ەسەپشى جانايىم سپابەكوۆانى باس بوستاندىعىنان ايىرۋ تۋرالى ۇكىم شىعاردى. سۋديا سوتتالۋشىلاردىڭ ءارقايسىسىن 8 جىلعا باس بوستاندىعىنان ايىردى. سونىمەن قاتار ەكەۋىنىڭ دە مۇلكى تاركىلەندى.
ايتا كەتەيىك وسىدان ءۇش جىل بۇرىن ەكس-رەكتورعا قاتىستى ق ر ق ك 189-بابىنىڭ 4-بولىمىمەن قىلمىستىق ءىس قوزعالعان ەدى.
دامير شىنىبەكوۆ پەن ەسەپشى جانايىم سپابەكوۆاعا 1,7 ميلليارد تەڭگەنى جىمقىردى دەگەن ايىپ تاعىلعان بولاتىن.
