«كۇي كۇمبىرى» چەللەندجى: استانادا 300 جاس مۋزىكانت ايگىلى كۇيلەردى ورىندادى
استانا. قازاقپارات - 20-ناۋرىز كۇنى №111 ورتا مەكتەپتە «كۇي كۇمبىرى» اتتى اۋقىمدى دومبىرا چەللەندجى ءوتتى. بۇل تۋرالى استانا قالاسى اكىمدىگىنىڭ باسپا ءسوز قىزمەتى حابارلادى.
ناۋرىزنامانىڭ ونكۇندىگىن تويلاۋ اياسىندا قوسىمشا ءبىلىم بەرۋ ۇيىمدارىنىڭ 300 دەن استام وقۋشىسى ايگىلى كۇيلەردى ورىندادى.
ءىس-شارانى ەلوردالىق ءبىلىم باسقارماسى قوسىمشا ءبىلىم بەرۋ ۇيىمدارىنىڭ قولداۋىمەن ۇيىمداستىردى. ونىڭ باستى ماقساتى - ۇلتتىق اسپاپتى كەڭىنەن ناسيحاتتاۋ، جاستاردىڭ ءداستۇرلى ونەرگە دەگەن قىزىعۋشىلىعىن ارتتىرۋ جانە دارىندى دومبىراشىلاردى قولداۋ.
چەللەندج ناۋرىز مەيرامىن تويلاۋ اياسىندا وتكىزىلىپ، ەلىمىزدىڭ بارلىق مەكتەبىن قامتيتىن جالپى ۇلتتىق باستامانىڭ ءبىر بولىگى بولدى. جاستار اراسىندا رۋحاني-ادامگەرشىلىك قۇندىلىقتاردى قالىپتاستىرۋعا، ءپاتريوتيزمدى نىعايتۋعا جانە ۇلتتىق مادەني مۇرانى ساقتاۋعا ىقپال ەتتى.
بايقاۋ بارىسىندا قۇرمانعازىنىڭ «بالبىراۋىن»، ا. جەلدىبايەۆتىڭ «ەركەسىلقىم»، «كەلىنشەك» اتتى اتى اڭىزعا اينالعان كۇيلەر ورىندالدى. جيىنعا قۇرمەتتى قوناقتار، ونەر مايتالماندارى مەن ۇستازدار قاتىسىپ، جاس انشىلەرگە قولداۋ كورسەتىپ، العان اسەرلەرىن تىلگە تيەك ەتتى.
چەللەندج 2023 -جىلدان بەرى وتكىزىلىپ كەلەدى جانە قازىردىڭ وزىندە ماڭىزدى مادەني ءىس-شاراعا اينالدى. سونداي-اق، 14-23-ناۋرىز ارالىعىندا ناۋرىزنامانىڭ ونكۇندىگى اياسىندا ەلىمىزدىڭ بارلىق مەكتەبىندە ارنايى تاقىرىپتاعى چەللەندجدەر، ەكولوگيالىق اكسيالار، ۇلتتىق ويىنداردان جارىستار ءوتىپ جاتىر.
ايتا كەتەلىك استانادا 20-22-ناۋرىز كۇندەرى قانداي سپورتتىق-بۇقارالىق ءىس- شارالار وتەتىنى تۋرالى جازعان ەدىك.
