كۇي كۇمبىرى اكسياسى اياسىندا 1 ميلليون وقۋشى كۇي تارتادى
استانا. قازاقپارات - 20-ناۋرىز كۇنى «كۇي كۇمبىرى» اكسياسى اياسىندا 1 ميلليون وقۋشى مەن پەداگوگ كۇي تارتادى. بۇل تۋرالى ورتالىق كوممۋنيكاتسيالار قىزمەتىندەگى بريفينگىدە وقۋ-اعارتۋ مينيسترلىگى تاربيە جۇمىسى جانە قوسىمشا ءبىلىم بەرۋ دەپارتامەنتىنىڭ ديرەكتورى ەرلان قالماقوۆ ايتتى.
- قازىرگى تاڭدا ءبىلىم بەرۋ ۇيىمدارىندا «ناۋرىزناما» تۇجىرىمداماسىنا سايكەس ءتۇرلى شارالار ۇيىمداستىرىلىپ جاتىر. سولاردىڭ ءبىرى - داستۇرگە اينالىپ ۇلگەرگەن «كۇي كۇمبىرى» اكسياسى. 20-ناۋرىز كۇنى ساعات 11-دە بارلىق مەكتەپتە ءبىر ۋاقىتتا كۇي وينالادى. وعان 1 ميلليونعا دەيىن وقۋشى مەن پەداگوگ قاتىسادى دەپ كۇتىلۋدە، - دەدى دەپارتامەنت باسشىسى.
سونىمەن قاتار ول «بالالار كىتاپحاناسى» ءبىلىم الۋشىلاردىڭ وقۋ ساۋاتتىلىعى مەن وقىرماندىق مادەنيەتىن وركەندەتىپ، رۋحاني كەمەلدىككە باستايتىنىن اتاپ ءوتتى. ونىڭ اياسىندا جاس وقىرماندارعا ۇسىنىلاتىن 2580 كىتاپ ىرىكتەلىپ، ءتىزىمى بەكىتىلگەنىن ايتتى.
- قازىرگى ۋاقىتتا وسى تىزىمگە ساي كىتاپحانا قورى تولىقتىرىلۋدا. باعدارلاما اياسىندا مەكتەپ كىتاپحاناسىنىڭ قورىن جىل سايىن 2 ميلليون داناعا ۇلعايتۋ كوزدەلىپ وتىر. بىلتىردان باستاپ بالالار كىتاپحاناسى پورتالى ىسكە قوسىلدى. 2025 -جىلى اقپان ايىندا اتالعان جوبا اياسىندا «شىن جۇرەكتەن كىتاپ سىيلا» چەللەندجىنە 700 مىڭنان اسا ءبىلىم الۋشى قاتىسىپ، ءبىر-بىرىنە كىتاپ سىيلادى. بۇل باستاما وقىرماندىق مادەنيەتتى دامىتۋعا، ءبىلىم الۋشىلار اراسىندا كىتاپ وقۋعا دەگەن قىزىعۋشىلىقتى ارتتىرۋعا وڭ ىقپال ەتەدى، - دەدى ەرلان قالماقوۆ.
بۇعان دەيىن پرەزيدەنت مەكتەپتەرگە ەنگىزىلەتىن «ادال ازامات» باعدارلاماسىن قولداعانىن جازعان ەدىك.
اۆتور
مارلان جيەمباي
