كوپتەگەن ەلدىڭ ۆاليۋتاسى قۇلدىرادى
الەمدە كوپ ەلدىڭ ۇلتتىق ۆاليۋتاسى قۇنسىزدانىپ جاتىر. ساياسات پەن نارىقتاعى جاعدايعا بايلانىستى ا ق ش دوللارىنىڭ ءوسىمى كوپ ەلدىڭ ينفلياتسياعا ۇشىراۋىنا اكەپ سوقتى.
كورشىمىز رەسەيدە رۋبل باعامى ءالى قالىپقا كەلە الار ەمەس. ال وڭتۇستىك كورەيادا ساياسي داعدارىس ۆونا قۇنىن تومەندەتىپ جىبەردى. وڭتۇستىك كورەيادا ۇلتتىق ۆاليۋتا قۇلدىرادى. ۆونا باعامى ا ق ش دوللارىنا شاققاندا 3 پايىزعا قۇنسىزدانىپ، كەيىنگى 2 جىلداعى ەڭ تومەنگى دەڭگەيگە جەتتى. ەكى كۇن بۇرىن 1 ا ق ش دوللارى 1445 ۆوناعا ساۋدالاندى. بۇعان ەلدەگى ساياسي داعدارىس اسەر ەتكەن. جەرگىلىكتى كومپانيالاردىڭ اكسيالارى دا ادەتتەگىدەن بىرنەشە ەسە تومەندەدى. "بلۋمبەرگ" ساراپشىلارى مۇنداي ۆاليۋتالىق داعدارىس 2008 -جىلدان بەرى العاش رەت تىركەلىپ وتىر - دەيدى. ءبىراق ەلدە جاريالانعان اسكەري جاعداي الىپ تاستالعان سوڭ ۆونا بىرتىندەپ قالىپقا كەلە باستادى. رەسەي ءرۋبلىنىڭ دە كەيىنگى 2 جىلدا ا ق ش دوللارىنا شاققانداعى قۇنى تىم قۇلدىراپ كەتتى. 2-جەلتوقساندا ساۋدا بيرجاسىندا 1 ا ق ش دوللارى 110 رۋبلدان ساۋدالاندى. كورشى ەلدىڭ ۆاليۋتاسىنىڭ تومەندەۋىنە گەوساياسي احۋال مەن مۇناي ەكسپورتىنا قاتىستى شەكتەۋلەر اسەر ەتتى. ەل ۇكىمەتى ۇلتتىق ۆاليۋتانى قولداۋ ماقساتىندا ەكسپورتتىق كومپانيالارعا ۆاليۋتا تۇسىمدەرىن رۋبلگە ايىرباستاۋدى مىندەتتەدى. ال ورتالىق بانك پايىزدىق مولشەرلەمەنى 21 پايىزعا دەيىن كوتەرىپ جىبەردى. سونىڭ سالدارىنان ينفلياتسيا ءوسىپ، تۇرمىسقا قاجەتتىنىڭ ءبارى قىمباتتاپ كەتكەن.
الەكساندر، ماسكەۋ قالاسىنىڭ تۇرعىنى:
- ۆاليۋتا باعامى تىم كوتەرىلىپ كەتتى. ءبىراق بىزدە ەش تاڭداۋ جوق. كۇنىمىزدى كورگىمىز كەلسە، امال جوق سوڭعى تيىنىمزعا دەيىن شىعارىپ ازىق-تۇلىك ساتىپ الامىز. باستىسى، تابىس تابۋعا مۇمكىندىگىمىز بار.
تاتيانا وگۋشەنكو، سۇلۋلىق سالونىنىڭ قىزمەتكەرى:
- رۋبل قۇلدىراعالى قىزمەت الۋشىلار قاتارى ازايدى. ويتكەنى جۇرت اقشاسىن تىرناعىن بوياتقاننان گورى، تۇرمىسقا قاجەتتى زات العاندى ءجون كورەدى.
مەكسيكالىق پەسو دا قۇنسىزدانىپ كەتتى. مەكسيكا ۆاليۋتاسى %2,15 تومەندەپ، ءبىر دوللار 21 پەسوعا دەيىن ءتۇستى. ساراپشىلار مۇنى ا ق ش- تىڭ جاڭادان سايلانعان پرەزيدەنتى دونالد ترامپتىڭ مەكسيكا، قىتاي جانە كانادادان كەلەتىن تاۋارلارعا باج سالىعىن ەنگىزۋ تۋرالى جوسپارىمەن بايلانىستىرادى. مەكسيكا بيلىگى بۇعان قارسى ءتيىستى شارالار قابىلداپ جاتىر.
گەكتور ورتەگا، ەكونوميست:
"مەنىڭشە، بۇل ەلدەرمەن قارىم- قاتىناسقا وزگەرىس ەنگىزۋ، مەكسيكاعا عانا ەمەس، كاناداعا دا اسەر ەتەدى. بۇل وداقتاس ساۋدا سەرىكتەستەرىمەن ىنتىماقتاستىق ورناتۋدىڭ تىڭ ءتاسىلى".
برازيليا برازيليا ۆاليۋتاسى رەال دا دوللارعا قاراعاندا بىرنەشە ەسە السىرەدى. جىل باسىنان ونىڭ قۇنى 20 پايىزعا تومەندەپ، تاريحي مينيمۋمعا جەتتى. 30-قاراشادا 1 ا ق ش دوللارى 6 رەالعا باعالاندى. مۇنداي جاعداي سوڭعى رەت پاندەميا كەزەڭىندە، وسىدان 4 جىل بۇرىن تىركەلگەن ەدى. برازيليا بيلىگى بۇعان قارسى شۇعىل شارا قابىلداپ، شىعىن كولەمىن 12 ميلليارد دوللارعا دەيىن قىسقارتۋدى شەشتى. ياعني ەڭ تومەنى جالاقى مولشەرىنىڭ وسىمىنە شەكتەۋ قويىپ، مەملەكەتتىك قىزمەتكەرلەرگە جوعارى جالاقى تولەۋگە تىيىم سالماق.
ءاسيا نۇرلىبايەۆا
