كوستەنكو شاحتاسىنداعى اپات: 46-كەنشىنىڭ دەنە بولشەكتەرى تابىلدى
ۇكىمەت وتىرىسىندا توتەنشە جاعدايلار ءمينيسترى سىرىم ءشارىپحانوۆ قاراعاندىنىڭ كوستەنكو شاحتاسىنداعى اپاتتان قازا تاپقان ادامداردىڭ سانى 46 عا جەتكەنىن ءمالىم ەتتى، دەپ حابارلايدى اگەنتتىگى kazinform.
«بۇگىنگى كۇنى ىزدەستىرۋ-قۇتقارۋ جۇمىستارى بارىسىندا 45 كەنشىنىڭ دەنەسى جانە الدىن-الا بولجام بويىنشا 46-شى قازا تاپقان ادامنىڭ دەنە بولشەكتەرى تابىلدى. قايتىس بولعان 40 ادامنىڭ جەكە باسى انىقتالدى، التاۋى ءالى بەلگىسىز. ولاردى سايكەستەندىرۋ ءۇشىن ءتيىستى ساراپتاما جۇرگىزىلەدى. ىزدەۋ جۇمىستارى ەلەكتر ەنەرگياسىنىڭ بولماۋىمەن، تاۋ-كەن قازبالارىنىڭ ۇزىندىعىمەن، كوپتەگەن بۇزىلعان مەحانيزمدەردىڭ بولۋىمەن قيىندادى. سۋ باسقان جەكەلەگەن تاۋ-كەن قازبالارىندا جۇمىس جاساۋ قيىنعا ءتۇستى»، - دەدى مينيستر.
سونداي-اق، ول شاحتانىڭ قىزمەتىن قالپىنا كەلتىرۋ ءۇشىن تاۋ-كەن قازبالارىن زەرتتەۋ جانە جەكەلەگەن ۋچاسكەلەردە سۋ سورۋ جۇمىستارى جۇرگىزىلىپ جاتقانىن ءمالىم ەتتى.
«اۆاريانىڭ سەبەپتەرىن تەرگەپ- تەكسەرۋ شەڭبەرىندە ۇكىمەتتىك كوميسسيا مۇشەلەرىمەن بىرگە شاحتاعا ءتۇستىم. ءبىز وتە ماڭىزدى بۇزىلۋلاردى انىقتادىق. تاۋ- كەن قازبالارىندا شاحتا جابدىقتارى جىلجىپ كەتكەن. 15 تەن استام وقشاۋلاعىش بوگەتتەر مەن جەلدەتۋ قۇرىلىستارى قيراعان»، - دەدى سىرىم ءشارىپحانوۆ.
ايتا كەتەيىك، 28-قازاندا قاراعاندى وبلىسىنداعى كوستەنكو اتىنداعى شاحتادا اپات بولىپ، كەيىن 45 ادامنىڭ قازا تاپقانى حابارلانعان بولاتىن.
وسىعان بايلانىستى قازاقستاندا 29-قازان - جالپىۇلتتىق ازا تۇتۋ كۇنى بولىپ جاريالاندى.
30-قازاندا ءبىرقاتار باق ءورت كەزىندە شاحتادا قالىپ قويعان 46 ادامنىڭ دا دەنەسىن تۋىستارى تانىعانىن حابارلادى.
