كوستەنكو شاحتاسىندا قازا بولعان كەنشىلەر جۇمىسقا كىرۋ ءۇشىن نەسيە الىپ، پارا بەرگەن بە
پرەمەر-ءمينيستردىڭ ورىنباسارى تامارا دۇيسەنوۆا ۇكىمەت وتىرىسىنان كەيىنگى باسپا ءسوز كونفەرەنتسياسىندا «ارسەللورميتتال تەمىرتاۋ» ا ق كومىر دەپارتامەنتىنىڭ باس ديرەكتورى مىندەتىن اتقارۋشى ۆاديم باسيننىڭ اينالاسىنداعى داۋلى مالىمەتكە پىكىر ءبىلدىردى، دەپ حابارلايدى Kazinform اگەنتتىگى.
«ەل جازىپ جاتىر، ءوزىڭىز دە شاحتەرلەردىڭ ايەلدەرىنىڭ ايتقانىن ەستىگەن شىعارسىز. كەنشىلەر شاحتاعا جۇمىسقا كىرۋ ءۇشىن نەسيە العان دەگەن مالىمەت بار. ول سحەمانى تۋرا وسى ۆاديم باسين ويلاپ تاپقان دەلىنەدى. وسى ماسەلەنىڭ تۇبىنە جەتەسىزدەر مە؟ ۇكىمەت تاراپىنان انتيكوردىڭ تەكسەرۋ جۇرگىزۋىن تالاپ ەتەسىزدەر مە؟» دەپ سۇرادى جۋرناليست.
تامارا دۇيسەنوۆا بۇل جاعداي ۇكىمەتتىك كوميسسيانىڭ جۇمىسى قورىتىندىلانعان كەزدە ناقتى بەلگىلى بولاتىنىن ايتتى.
«ەڭبەك ينسپەكتسياسى ۇكىمەتتىك كوميسسيا قۇرامىنا كىردى. ول ينسپەكتسيا ءتارتىپ بويىنشا مىندەتتى تۇردە جۇمىس جۇرگىزەدى. ءبىراق ۆاديم باسين تۋرالى ەشتەڭە ايتا المايمىن. ول تەكسەرۋدەن كەيىن بەلگىلى بولاتىن شىعار»، - دەدى ۆيتسە-پرەمەر.
ەسكە سالساق، كوستەنكو شاحتاسىنداعى 46 كەنشىنىڭ ءومىرىن جالماعان اپاتتان كەيىن ۆاديم باسين «ارسەللورميتتال تەمىرتاۋ» ا ق كومىر دەپارتامەنتىنىڭ باس ديرەكتورى مىندەتىن اتقارۋشى بولىپ تاعايىندالعان ەدى.
