كوستەنكو شاحتاسىنان 46-كەنشىنىڭ دەنەسى تابىلدى
كەشە كەشكە تاۋ-كەن قۇتقارۋشىلارى جۋىردا اپات بولعان كوستەنكو اتىنداعى شاحتادان 46-شى كەنشىنىڭ دەنەسىن تاپتى. ونى شامنىڭ باتارەياسىنداعى جەكە ءنومىرى ارقىلى تانىدى، دەپ حابارلايدى Kazinform اگەنتتىگىنىڭ ءتىلشىسى.
كەشە كەشكە كوستەنكو شاحتاسىندا تاۋ-كەن تازارتۋ كەنشىسى پروكۋدين الەكساندر ۆالەريەۆيچتىڭ دەنەسى تابىلدى. ول قازا بولعان 46 شاحتەرلەردىڭ ءبىرى بولدى. بۇعان دەيىن ت ج م ونىڭ دەنەسىنىڭ ءبىر بولىگى تابىلعانىن حابارلاعان بولاتىن. الايدا ساراپتاما قاجەت بولدى. سوندىقتان 46-شى كەنشى تۋرالى رەسمي تۇردە ەش حابار بولعان جوق.
«6-قاراشا كۇنى ساعات 20:00-دە كوستەنكو اتىنداعى شاحتادان قازا تاپقان 46-شى شاحتەردىڭ دەنەسى تابىلىپ، جەر بەتىنە كوتەرىلدى. قاجەتتى ساراپتامالار جۇرگىزىلدى. ىزدەستىرۋ جۇمىستارىنا «كاسىبي اسكەري اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى» ج ش س قاراعاندى فيليالىنىڭ تاۋ-كەن قۇتقارۋشىلارى جۇمىلدىرىلدى. ىزدەۋ جۇمىستارى تاۋلىك بويى جۇرگىزىلدى»، - دەپ حابارلادى قاراعاندى وبلىسى اكىمىنىڭ باسپا ءسوز قىزمەتى.
شاحتانىڭ قىزمەتكەرلەرى حابارلاعانداي، سوڭعى قازا تاپقان كەنشىنى شامنىڭ باتارەياسىنداعى جەكە نومىرىنەن تانىعان.
«ىزدەۋ جۇمىستارى قيىن جاعدايدا جۇرگىزىلدى. دەنەنى الىپ شىعۋ وتە قيىن بولدى. ونىڭ كەۋدەسىندە جەكە ءنومىرى جازىلعان شامنىڭ باتارەياسى بولدى. قازىر كريميناليستەر جۇمىس ىستەۋدە. ساراپتاما ءجۇرىپ جاتىر»، - دەدى كوستەنكو اتىنداعى شاحتانىڭ ۇڭگىلەۋ جونىندەگى باس ينجەنەردىڭ ورىنباسارى ۆلاديمير گونوچەنكو.
