كوستەنكو اتىنداعى شاحتادا 32 كەنشى قازا بولعانى انىقتالدى
سوڭعى مالىمەتتەرگە ساي، قاراعاندى وبلىسىنداعى كوستەنكو اتىنداعى شاحتادا 32 كەنشىنىڭ وپات بولعانى بەلگىلى بولدى، دەپ حابارلايدى Kazinform.
ساناۋلى ۋاقىت بۇرىن عانا 28 كەنشىنىڭ دەنەسى تابىلىپ، 18 ادام ىزدەستىرىلىپ جاتقانىن حابارلاعان ەدىك. وكىنىشكە قاراي، قۇربان بولعان كەنشىلەر سانى ءسات ساناپ ارتۋدا.
ءدال قازىر «ارسەلورميتتال تەمىرتاۋ» ا ق- نىڭ كوستەنكو اتىنداعى شاحتاسىنداعى اپاتتان كەيىن 14 ادام تابىلماي جاتىر. بۇل تۋرالى «ارسەلورميتتال تەمىرتاۋ» ا ق كومىر دەپارتامەنتىنىڭ پەرسونال جونىندەگى ديرەكتورى ەركەبۇلان مۇقانوۆ ايتتى.
«قازىر شاحتادا 32 ادام قازا بولعانى انىقتالدى. ءبىر ساعات بۇرىنعى مالىمەت بويىنشا 6 ادامنىڭ دەنەسى شىعارىلدى. 14 ادامدى ىزدەستىرۋ جالعاسىپ جاتىر»، - دەدى ە. مۇقانوۆ Kazinform تىلشىسىنە بەرگەن سۇحباتىندا.
بۇدان بۇرىن حابارلانعانداي، شاحتاداعى ءورت فاكتىسى بويىنشا قىلمىستىق كودەكستىڭ 277-بابىنىڭ 3-بولىگى «تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك قاعيدالارىن بۇزۋ» بابى بويىنشا سوتقا دەيىنگى تەرگەپ-تەكسەرۋ باستالدى.
مەملەكەت باسشىسىنىڭ تاپسىرماسىنا سايكەس پرەمەر-مينيستر ءاليحان سمايىلوۆتىڭ توراعالىعىمەن اپاتتىڭ سەبەپتەرىن تەرگەۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى.
