كورەيادا 3 جىل ىشىندە 40 مىڭعا جۋىق ادام وزىنە قول جۇمساعان
كەيىنگى 3 جىلدا وڭتۇستىك كورەيادا 40 مىڭعا جۋىق كورەيالىق سۋيتسيد جاساعان، سونداي-اق جاستار اراسىندا ءوزىن-ءوزى ولتىرگەندەر سانى ارتقانى بايقالادى. Kazinform بۇل تۋرالى The Korea Herald باسىلىمىنا سىلتەمە جاساپ حابارلايدى.
كورەيانىڭ دەنساۋلىق ساقتاۋ مينيسترلىگى مەن اۋرۋلاردى باقىلاۋ جانە الدىن الۋ اگەنتتىگىنىڭ مالىمەتى بويىنشا، 2020-2022 -جىلدار ارالىعىندا 39453 ادام وزىنە قول جۇمساعان.
بۇل كورسەتكىش سول ارالىقتا بولعان COVID-19-دان قازا تاپقاندار سانىنان اسىپ ءتۇستى. پاندەميا كەزىندە 32156 ءولىم تىركەلگەن بولاتىن.
كورەيادا كەيىنگى بەس جىلدا جالپى سۋيتسيد سانى تومەندەدى. 2018-2022 -جىلدار ارالىعىندا 100 مىڭ ادامعا شاققاندا 28,6 دان 25,2 گە دەيىن ازايدى. دەگەنمەن جاسوسپىرىمدەر مەن جاستار اراسىندا ارتىپ جاتىر.
وزىنە قول جۇمساۋ كورسەتكىشى جاسوسپىرىمدەر اراسىندا 100 مىڭ ادامعا شاققاندا 2018 -جىلى 5,8 بولسا، 2022 -جىلى 7,2 گە جەتكەن. ال 20-29 جاس ارالىعىنداعى ادامداردا سول كەزەڭدە 17,6 دان 21,4 كە كوبەيدى.
