كونستيتۋتسيالىق سوت «جەردىڭ استى مەن ءۇستى حالىق يگىلىگى» ەكەنى تۋرالى باپتىڭ ءمانىن تۇسىندىرۋدەن باس تارتتى
كونستيتۋتسيانىڭ 6-بابىنىڭ 3-تارماعى مەملەكەتتىك ورگانداردى جەر قويناۋىن يگەرۋشىلەرمەن جاسالعان كەلىسىمشارتتاردى جالپىعا قولجەتىمدى ەتىپ جاريالاۋعا مىندەتتەي مە، مىندەتتەمەي مە؟
Kazinform اگەنتتىگىنىڭ بۇل ساۋالىنا ق ر كونستيتۋتسيالىق سوتىنىڭ اپپارات باسشىسى جاۋاپ بەردى.
كونستيتۋتسيانىڭ 6-بابىنىڭ 3-تارماعىندا قازاقستان جەرىنىڭ ءۇستى مەن استى حالىقتىڭ يگىلىگى ەكەنى ايتىلعان. وسى باپتى العا تارتقان ساراپشىلار مەن كەيبىر دەپۋتاتتار ۇكىمەتتى قازاقستان اۋماعىندا جۇمىس ىستەپ جۇرگەن ءىرى جەر قويناۋىن يگەرۋشىلەرمەن جاسالعان كەلىسىمشارت ءماتىنىن كوپشىلىككە جاريالاۋعا ۇندەپ ءجۇر. كونستيتۋتسيالىق سوتتان وسى تالاپتىڭ قانشالىقتى ورىندى ەكەنىن سۇراپ، ساۋال جولداعان ەدىك.
«جولدانىمدا ءسىز «كونستيتۋتسيانىڭ 6-بابىنىڭ 3-تارماعى مەملەكەتتىك ورگانداردى جەر قويناۋىن يگەرۋشىلەرمەن جاسالعان كەلىسىمشارتتاردى جالپىعا قولجەتىمدى ەتىپ جاريالاۋعا مىندەتتەيتىنى نەمەسە مىندەتتەمەيتىنى جونىندە جاۋاپ بەرۋدى سۇراۋداسىز. بۇل رەتتە، قازاقستان رەسپۋبيكاسى كونستيتۋتسياسىنىڭ 72-بابى 1-تارماعىنىڭ 4) - تارماقشاسىنا سايكەس كونستيتۋتسيانىڭ نورمالارىنا رەسمي تۇسىندىرمەنى كونستيتۋتسيالىق سوت قازاقستان رەسپۋبليكاسى پرەزيدەنتىنىڭ، سەنات ءتوراعاسىنىڭ، ءماجىلىس ءتوراعاسىنىڭ، پارلامەنت دەپۋتاتتارى جالپى سانىنىڭ كەمىندە بەستەن ءبىر بولىگىنىڭ، پرەمەر-ءمينيستردىڭ ءوتىنىشى بويىنشا عانا بەرەدى»، - دەپ جازىلعان جاۋاپتا.
رەسمي جاۋاپتا قاراپايىم ازاماتتار كونستيتۋتسيالىق سوتقا تىكەلەي وزىنە قاتىستى ماسەلەلەر بويىنشا، ونىڭ وزىندە وزگە زاڭناما قۇجاتتارىنىڭ كونستيتۋتسياعا سايكەستىگى بويىنشا عانا سۇراۋ سالا الاتىنى ايتىلعان. ال كونستيتۋتسيانىڭ نورمالارى بويىنشا كونستيتۋتسيالىق سوتقا ءوز بەتىمەن جۇگىنە المايدى. كەمىندە پارلامەنت دەپۋتاتتارىنىڭ 5 تەن ءبىر بولىگىنىڭ قولى جينالعان ساۋال جولداۋ قاجەت.
«كونستيتۋتسيالىق سوت ازاماتتاردىڭ وتىنىشتەرىنە ولاردىڭ كونستيتۋتسيادا بەكىتىلگەن قۇقىقتارى مەن بوستاندىقتارىن تىكەلەي قوزعايتىن نورماتيۆتىك قۇقىقتىق اكتىلەرىنىڭ رەسپۋبليكا كونستيتۋتسياسىنا سايكەستىگىن قارايدى (كونستيتۋتسيانىڭ 72-بابى 3-تارماعى). ازاماتتاردىڭ كونستيتۋتسيالىق سوتقا جۇگىنۋ ءتارتىبى مەن شارتتارى كونستيتۋتسيالىق زاڭنىڭ 44، 45-باپتارىندا ناقتىلانعان. ءوتىنىشىڭىز اتالعان شارتتار مەن تالاپتارعا سايكەس كەلمەيدى»، - دەلىنگەن جاۋاپتا.
