كومەك شىن مۇقتاج ازاماتتارعا عانا كورسەتىلۋى كەرەك - مەملەكەت باسشىسى
بۋراباي. KAZINFORM - پرەزيدەنت قاسىم-جومارت توقايەۆ ۇلىتاۋدا ءوتىپ جاتقان ۇلتتىق قۇرىلتايدىڭ IV وتىرىسىندا ۇكىمەتكە جىل اياعىنا دەيىن الەۋمەتتىك سيپاتتاعى شىعىنداردى وڭتايلاندىرۋدى تاپسىردى.
- ءبىزدىڭ ەلىمىز - الەۋمەتتىك مەملەكەت. سوندىقتان ءبىلىم بەرۋ، دەنساۋلىق ساقتاۋ سالالارىنا ينۆەستيتسيا سالۋدى جالعاستىرامىز. بۇل - ءبىزدىڭ كونستيتۋتسيالىق مىندەتىمىز. ءبىراق شىن مۇقتاج ازاماتتارعا عانا كومەك كورسەتىلۋى كەرەك. قىزمەتىن اسىرا پايدالانۋعا، الاياقتىققا جول بەرىلمەيدى. سوندىقتان باسىمدىق بەرىلمەگەن جوبالارعا بولىنەتىن قارجى ازايادى. بۇل قاجەت شارا ەكەنى ايدان انىق. ۇكىمەت وسى جىلدىڭ سوڭىنا دەيىن ونى قالاي وڭتايلاندىرۋ كەرەكتىگىن ءبىرجولا انىقتاپ الۋعا ءتيىس، - دەدى پرەزيدەنت.
قاسىم-جومارت توقايەۆ ۇكىمەت ۇسىنعان سالىق رەفورماسىنا دا توقتالدى.
- بۇل شارالار، جالپى العاندا، دۇرىس. وندا نەگىزگى ەكونوميكالىق جانە الەۋمەتتىك فاكتورلار ەسكەرىلگەن. كاسىبي ماماندار دا، جالپى جۇرتشىلىق تا قوسىمشا قۇن سالىعىنىڭ مولشەرلەمەسىن كوتەرۋ قاجەتتىگىنە تۇسىنىستىكپەن قارايدى. دەگەنمەن ۇسىنىلعان شارالارعا، سونىڭ ىشىندە، قوسىمشا قۇن سالىعىنا قاتىستى سىن-پىكىرلەر دە ەستىلىپ قالادى. ءبىراق مۇنداي پايىم شىنايى احۋالعا نەگىزدەلمەگەن. ءتۇرلى سەبەپكە بايلانىستى وزىنە اۋقىمدى الەۋمەتتىك مىندەتتەمە المايتىن ەلدەر از ەمەس. ال قازاقستاننىڭ بيۋدجەت قارجىسىنىڭ جارتىسىنان كوبى الەۋمەتتىك سالانىڭ ەنشىسىندە، - دەدى مەملەكەت باسشىسى.
ايتا كەتۋ كەرەك، قۇرىلتايدىڭ پانەلدىك سەسسيالارى كەشە باستالعان. ول سەكسيالاردىڭ تاقىرىپتارى ازاماتتىق قوعام، مادەنيەت، ونەر، رۋحانيات، ءبىلىم جانە عىلىم، الەۋمەتتىك- ەكونوميكالىق دامۋ ماسەلەلەرىن قامتىدى.
2022 -جىلى ۇلتتىق قۇرىلتاي العاش جاندانعاننان بەرى ەلدەگى الەۋمەتتىك-ەكونوميكالىق ماسەلەلەر شەشىم تاۋىپ كەلەدى. جىل وتكەن سايىن تاقىرىپ اياسى كەڭىدى، ايتىلاتىن سالماقتى وي ۇلعايدى.
اۆتور
ەسىمجان ناقتىباي
