كولىكتى قىسقا قالاي دايىنداۋ كەرەك؟
قىستىڭ قامىن جازدا ويلايتىن قازاق كولىگىن دايىنداۋدى الدەقاشان دايىنداۋدى باستاپ كەتكەن شىعار. ال كۇن سايىن «ەرتەڭ» دەگەن سىلتاۋمەن ۋاقىت وتكىزسەڭىز ارتى ۇلكەن شىعىنعا الىپ كەلۋى مۇمكىن. نولدەن تومەن تەمپەراتۋرادا كەز كەلگەن تەمىر تۇلپاردىڭ بۇزىلۋ قاۋىپى كوبەيەدى. مۇنداي جاعدايدى بولدىرماس ءۇشىن قايتپەك كەرەك؟ كولىگىڭىزدى «قىسقا» قالاي دايىنداۋ كەرەك؟
***
شينالاردى اۋىستىرىڭىز
جازعى شينالاردى قىسقىعا اۋىستىرۋ ەڭ باستى مىندەت. تومەن تەمپەراتۋرادا جازعى دوڭگەلەكتەرمەن ءجۇرۋ ومىرىڭىزگە قاۋىپ توندىرەدى. شينالاردى ەرتە كەزدەن دايارلاپ قويۋدى ۇمىتپاڭىز. ونىڭ ۇيكەلىس شينالار (فريكتسيوننىە شينى) جانە تىكەندى رەزەڭكە دەگەن ەكى ءتۇرى بولادى. ۇيكەلەس شينالار سالعاندا كولىگىڭىز ءوزىن اسفالتتا جاقسى ۇستايدى. ال قارى ۋاقىتىلى تازالانبايتىن قازاقستاندا تىكەندى رەزەڭكە بولعانى دۇرىس. ەسكى دوڭگەلەكتەردە جارىقتار پايد بولسا جانە پروتەكتورى 4 ميلليمەتردەن كىشى بولسا ولاردى جاڭالاعان ابزال. ايتا كەتەيىك ءبىزدىڭ ەلدە 1-جەلتوقساننان باستاپ قىسقى دوڭگەلەك سالماعان جۇرگىزۋشىلەرگە ايىپپۇل سالىنادى.
اككۋمۋلياتوردى قۋاتتاپ كلەمالاردى تازالاڭىز
قىستىڭ كۇنى ەڭ ءجيى كەزدەسەتىن پروبلەما اككۋمۋلياتوردىڭ وتىرىپ قالۋى. ويتكەنى قىسقى ءتۇن قۋاتتىڭ تەز ازايۋىنا اسەر ەتەدى. بۇل اككۋمۋلياتوردىڭ سىنالار شاعى دەسەكتە بولادى. ال ونىڭ الدىن الۋ ءۇشىن ءار باكاداعى ەلەكتروليت مولشەرىن تەكسەرۋ ماڭىزدى. سۇيىقتىق ءمولدىر بولۋى ءتيىس. ال تۇنبا پلاستينالاردىڭ قۇلاي باستاعانىن بىلدىرەدى. ەگەر دەڭگەيى تومەن بولسا تازارتىلعان سۋ قوسىڭىز. قىستا ەلەكتروليتتىڭ تىعىزدىعى 1,27-1,28 گ/س م3 ±0,01 گ/س م3 بولۋى كەرەك. ەگەر ءسىز نورمانى كوتەرە الماساڭىز، وندا جاڭا باتارەيا ساتىپ العانىڭىز ابزال.
سونداي-اق، قىسقا تۇيىقتالۋدى بولدىرماۋ جانە اككۋمۋلياتوردىڭ قىزمەت ەتۋ مەرزىمىن ۇزارتۋ ءۇشىن سىمداردى تەكسەرۋدى، كلەمالاردى توتىعۋدان تازارتۋدى جانە كونتاكتىلەردى قاتايتۋدى ۇمىتپاڭىز.
جۇمىس ىستەمەيتىن فارالاردى اۋىستىرىڭىز
كولىكتىڭ الدىڭعى جارىقشامدارى قىستا قاۋىپسىز ءجۇرۋدىڭ نەگىزگى اسپەكتىلەرى. ويتكەنى تاڭعى جانە كەشكى ۋاقىتتا اۆتوكولىك اۋەسقويلارىن تەك جارقىن فارالار قۇتقارادى. سول سەبەپتى جارىقشامداردىڭ ماڭىزدىلىعىن ەلەمەۋگە بولمايدى. ۋاقىت وتە كەلە فارالار كىرمەن، سىزاتتارمەن بۇلىڭعىرلانىپ جارىق ءتۇسىرۋى السىرەي باستايدى. قاپەرىڭىزدە بولسىن، كۇز مەزگىلى ەسكى فارالاردى جىلتىراتۋ مەن كۇيىپ كەتكەن «كسەنوندى» اۋىستىرۋ ءۇشىن ەڭ جاقسى ۋاقىت.
قوزعالتقىشتى دياگنوستيكادان وتكىزۋ
اۆتوكولىكتىڭ قوزعالتقىشىنداعى اقاۋلاردى تولىقتاي جوندەۋ كەرەك. سەبەبى جازدا كوز جۇما قاراعان كىشىگىرىم ماسەلەلەر قىستا ىستەن شىعا باستايدى. نەگىزىنەن سۆەچالار مەن ەلەكتر سىمدارى قوزعالتقىشتى ىسكە قوسۋدا قيىندىقتار تۋىنداتىپ، ونىڭ بۇزىلۋىنا اكەپ سوقتىرادى. بۇل دەگەنىمىز بارلىق توزعان دۇنيەلەردى جاڭاسىنا اۋىستىرۋعا تۋرا كەلەدى.
قوزعالتقىش مايىن اۋىستىرىڭىز
سۋىق اۋا- رايىندا ماتوردىڭ مايى قويۋلانا تۇسەدى. ءسويتىپ قوزعالتقىش بولشەكتەرىنىڭ تەز توزۋى مەن اككۋمۋلياتور قۋاتىنىڭ ازايۋىنا الىپ كەلەدى. ءسىز جازدا قويۋلىعى 10W - 40 ماي قۇيساڭىز، قىس كەلگەندە
5W-30 نەمەسە 5W-40 قابىلداعان دۇرىس.
قوزعالتقىشتى سۋىقتان وقشاۋلاۋ
اشىق جەردە تۇرعان ەسكى اۆتوكولىكتەردىڭ 90 پايىزى تاڭەرتەڭ ىسكە قوسىلماي جاتادى. سول سەبەپتى قوزعالتقىشتى جىلى كورپەمەن جابۋ ارتىقتىق ەتپەيدى. اسىرەسە رادياتورعا جىلۋ قالقانىن ورناتۋ، قوزعالتقىش بولىگىنىڭ بۇيىرلەرى مەن تۇبىنە جىلۋ وقشاۋلاعىش پانەلدەردى ورناتۋ جانە قوزعالتقىشتى اۆتو كورپەمەن جابۋ ماڭىزدى.
تەجەگىش جاستىقشالارىن (كولودكي) تەكسەرىپ سۇيىقتىعىن (جيدكوست) اۋىستىرىڭىز
تەجەگىش سۇيىقتىعىن ەكى جىلدا ءبىر رەت ۇنەمى اۋىستىرىپ وتىرۋ كەرەك. سونىمەن قاتار تەجەگىش جاستىقشالارىن جىل سايىن تەكسەرىپ وتىرۋ ماڭىزدى. ەگەر اۆتوموبيل قالىپتى جاعدايدا وزگەرىسسىز توقتاسا دا جۇرگىزۋشى ونى قاداعالاۋى كەرەك. ءار دوڭگەلەك بىردەي كۇشپەن باياۋلاۋى كەرەك، ايتپەسە مۇزدى جولدا سىرعاناۋ جانە اپات تۋدىرۋ قاۋپى كوبەيەدى.
شىنى تازالاعىش شەتكالاردى اۋىستىرىپ، ايازدا قاتپايتىن سۇيىقتىقتى قۇيىڭىز
قالىڭ قار تۇسكەندە شىنى تازالاعىش شەتكالارعا دا اۋىرتپاشىلىق ارتا تۇسەدى. ايازدا قاتىپ، الدىڭعى تەرەزەنى تازالاۋى ناشارلايدى. سوندىقتان قىس مەزگىلىنە ارنالعان، سۋىققا ءتوزىمدى (قاتىپ كەتپەيتىن) «تازالاعىشتاردى» ورناتقان ءجون. سونىمەن قاتار تەرەزەگە شاشاتىن سۇيىقتىقتى دا اۋىستىرىپ قويىڭىز. ءيىسسىز، قاتپايتىن «كوك سۋدى» تاڭداڭىز.
Massaget.kz
