كولىكتى گازعا اۋىستىرۋ شارالارىنا شەكتەۋ قويىلۋى مۇمكىن
ەنەرگەتيكا ءمينيسترى الماسادام ساتقاليەۆ كولىكتى گازعا اۋىستىرۋمەن اينالىساتىن اۋەسقويلاردىڭ جۇمىسىنا شەكتەۋ قويىلۋى مۇمكىن ەكەنىن ايتتى، دەپ حابارلايدى Kazinform.
«سۇيىتىلعان مۇناي گازى سۇيىتىلعان كومىرسۋتەك گازىنا جاتاتىنىن بىلەسىزدەر. بۇل ادام ءۇشىن قاۋىپسىزدىگى 4-كلاسقا جاتاتىن قوسىلىس دەگەن ءسوز. اۋامەن ارالاسقان كەزدە جارىلىپ، ءورت تۋىنداتاتىن زاتتىڭ ءبىرى بولىپ ەسەپتەلەدى. ياعني، وسى ءونىمدى قولدانۋشىلارعا مۇنى دا ەسكەرۋ كەرەك. ءبىز ءبىرقاتار شارا قابىلداۋدى جوسپارلاپ وتىرمىز. قازىردىڭ وزىندە سۇيىتىلعان مۇناي گازىنىڭ ەكسپورتىنا تىيىم سالدىق. قازىر كولىك يەلەرىنە ماشيناسىن گازعا اۋىستىرماۋعا كەڭەس بەرەمىز دەپ ايتىپ ءجۇرمىز. كەيىن وسىنداي اۋەسقوي تاسىلمەن كولىكتى گازعا اۋىستىرۋ امالدارىن تولىق تىيىم سالۋعا دەيىن باراتىن شەكتەۋ شارالارىن قابىلداۋىمىز مۇمكىن»، - دەدى ۆەدومستۆو باسشىسى.
سونداي-اق مينيستر سۇيىتىلعان گازدى جانارماي رەتىندە پايدالانعاننان دا مۇناي-حيميا وندىرىسىندە شيكىزات رەتىندە قولدانۋ الدەقايدا ءتيىمدى ەكەنىن ەسكە سالدى.
