ەۋرو-2024: قازاقستان تۇڭعىش رەت فينليانديادان باسىم ءتۇستى
فۋتبولدان 2024 -جىلعى ەۋروپا چەمپيوناتىنا ىرىكتەۋ ساتىسىندا قازاقستان قۇراماسى سەگىزىنشى ويىنىن فينلياندياعا قارسى وتكىزدى، دەپ حابارلايدى Kazinform.
كەزدەسۋ بارىسىندا قۇرامالار العاشقى مينۋتتان شابۋىلعا كوشتى. ەكەۋىنە دە جەڭىسكە جەتۋ وتە ماڭىزدى بولاتىن. قورجىنعا ءۇش ۇپاي سالعان قۇراما ءالى دە قۇرلىقتىق دودا فينالدىق ساتىسىنا بەرىلەتىن جولداماعا تالاساتىن قۇرامالار قاتارىنا قوسىلاتىن ەدى.
ويىننىڭ 28-مينۋتىندا فينليانديالىق روبەرت تەيلور ەسەپ اشىپ كەتتى. قازاقستاندىق فۋتبولشىلار ءبىرىنشى كەزەڭدە تارازى باسىن تەڭەستىرۋگە ۇمتىلدى. دەگەنمەن تابلوداعى ەسەپكە وزگەرىس ەنگەن جوق.
ەكىنشى كەزەڭدە دە قوس قۇراما الما-كەزەك شابۋىلعا كوڭىل ءبولدى. ويىننىڭ 76-مينۋتىندا فينليانديالىق قورعاۋشىلار ءوزىنىڭ ايىپ الاڭىندا قولمەن ويناپ، تورەشىلەر پەنالتي بەلگىلەدى. ونى قازاقستاندىق باكتيەر زاينۋتدينوۆ مۇلتىكسىز ورىنداپ، تارازى باسىن تەڭەستىردى. ول 90-مينۋتتا اۋەلەپ كەلگەن گولدى قاقپاعا ەنگىزدى. وسىلايشا ۇلتتىق قۇراما جەيدەسىندەگى 14-گولىن سوعىپ، سۇرمەرگەندەر كوشىن باستادى. ناتيجەسىندە بۇدان بۇرىن 13 گول سوققان رۋسلان بالتيەۆتى ارتقا تاستاپ كەتتى.
وسىلايشا قازاقستان قارسىلاسىنان 2:1 ەسەبىمەن باسىم ءتۇستى. ولار ءالى دە ەۋروپا چەمپيوناتى فينالدىق ساتىسىنا بەرىلەتىن جولداماعا تالاساتىن مۇمكىندىككە يە بولىپ وتىر.
ايتا كەتسەك، ەكى قۇراما بۇعان دەيىن رەسمي ويىنداردا بەس مارتە كەزدەسىپ، بارلىعىندا فينليانديالىق فۋتبولشىلار جەڭىسكە جەتكەن ەدى.
سونداي-اق اتالعان توپتا سولتۇستىك يرلانديا مەن سلوۆەنيا، سان-مارينو مەن دانيا قۇرامالارى كەزدەسەدى.
ەندى قازاقستاندىق فۋتبولشىلار الداعى ويىندارىندا 17-قاراشادا ەلوردادا سان-مارينونى قابىلداسا، 20-قاراشادا سىرت الاڭدا سلوۆەنيامەن كەزدەسەدى.
ەسكە سالساق، بۇدان بۇرىن ەل قۇراماسى جەتى كەزدەسۋ وتكىزدى. ەل قۇراماسى ءوز الاڭىندا سلوۆەنيادان - 1:2، فينليانديادان - 0:1، سىرت الاڭدا دانيادان 1:3 ەسەبىمەن جەڭىلسە، دانيانى (3:2)، سان- مارينونى (3:0)، سولتۇستىك يرلانديا (ەكى مارتە - 1:0، 1:0) قاپى قالدىردى.
