ەكولوگيا مينيسترلىگى بۇركىت سانى مەن قۇسبەگىلىك نورمالارىن قالاي رەتتەمەكشى - مينيستر جاۋابى

- ورنيتولوگتار ەلەكتر جەلىسىنىڭ كوپ تارتىلۋى مەن قۇسبەگىلىكتىڭ قايتا جاندانۋىنا بايلانىستى جابايى تابيعاتتا بۇركىت سانى ازايىپ كەتكەنىن ايتىپ ءجۇر؟ قۇسبەگىلەردىڭ بۇركىتتى جابايى تابيعاتقا قايتا بوساتۋىن رەتتەيتىن نورمالار ەنگىزەسىزدەر مە؟ ەلدەگى بۇركىتتەردىڭ نەشە پايىزى جابايى تابيعاتتا، نەشە پايىزى قۇسبەگىلەردىڭ قولىندا، - دەپ سۇرادى جۋرناليست.

مينيستر ۆەدومستۆو ماماندارىنىڭ قولىندا بۇل تۋرالى ناقتى ستاتيستيكا جوق ەكەنىن ايتتى. سەبەبى، بۇركىت قىزىل كىتاپقا ەنبەگەن.

— بۇركىتتى جابايى تابيعاتتان الۋ، ونى قايتا بوساتۋ ماسەلەلەرى جابايى اڭعا تيەسىلى زاڭدا بەلگىلەنگەن نورماتيۆتىك- قۇقىقتىق اكتىلەرى بار. ول جاعىنان ەشقانداي ماسەلە جوق. بۇركىت سانىن ناقتى بىلمەيمىن. رەسمي ساندار بىزدە جوق. ونى ەسەپتەۋگە قاراجات قايدا؟ بۇكىل اڭدى ەسەپتەۋ ءۇشىن قاراجات كەرەك. سوندىقتان قىزىل كىتاپتاعى، جويىلىپ كەتۋ قاۋپى بار قۇستاردى عانا نازاردا ۇستايمىز. قالعاندارى نازاردان تىس قالىپ تۇر. سول سەبەپتەن بۇركىت، سۇڭقار سياقتى جىرتقىش قۇستاردى باقىلاۋعا الاتىن ۋاقىت كەلدى. سول ءۇشىن بولاشاقتا بۇل ماسەلەنى عىلىمي- زەرتتەۋ جۇمىستارى ارقىلى ءبىلىپ، سونىڭ انىق- قانىعى بويىنشا ءىس- شارالاردى قاراستىرامىز، - دەدى ەرلان نىسانبايەۆ.

ءمينيستردىڭ ايتۋىنا قاراعاندا، بۇركىتتەن گورى سۇڭقارلاردىڭ ماسەلەسى وتكىر بولىپ تۇر.

- وزدەرىڭىز سياقتى وسىنداي پروبلەما بار ەكەنىن ەستىپ ءجۇرمىز. تەك بۇركىت قانا ەمەس، سۇڭقارلاردىڭ ازايىپ كەتكەنى تۋرالى مالىمەتتەر بار. شامامەن ءبىر اي بۇرىن عالىمدارمەن وسى ماسەلەنى تالقىلاعانبىز. وعان ءازىر قاراجات قاراستىرۋ كەرەك، مۇنى زەرتتەۋ كەرەك. ارينە، توك جۇرەتىن سىمدار تەك بۇركىتكە عانا ەمەس، قاي-قاي قۇستىڭ پوپۋلياتسياسىنا اسەر ەتىپ جاتىر. سول سەبەپتەن ەڭ الدىمەن عىلىمي- زەرتتەۋ جۇمىستارىن ۇيىمداستىرۋ كەرەك بولىپ تۇر. مىسالى، ەكى جىلداي بۇرىن رەسەي عالامى سۇڭقار ماسەلەسىن كوتەردى. دەگەنمەن ناقتى دەرەكتەر جوق. سوندىقتان جاي ايتىلعان بولجامدار نەگىزىندە قانداي دا ءبىر ءىس- شارا قابىلداۋعا بولمايدى. عالىمدار سۇڭقارلار ماسەلەسىن زەرتتەۋ كەرەك دەپ وتىر. بۇركىتكە ءسىز ايتقان فاكتورلاردىڭ اسەرى ءتيىپ جاتسا، سۇڭقارلارعا كەيبىر مەملەكەتتەردىڭ ازاماتتارى قىزىعۋشىلىق تانىتقان جاعدايلار بولدى. ءبىراق ءقازىر ونداي قىزىعۋشىلىقتارعا قاتاڭ تىيىم سالىنعان، زاڭ بار، - دەدى ۆەدومستۆو باسشىسى.

ايتا كەتسەك، بۇگىنگى ۇكىمەت وتىرىسىندا پرەمەر-مينيستر ولجاس بەكتەنوۆ ەكولوگيا جانە تابيعي رەسۋرستار مينيسترلىگىنىڭ قوقىس پوليگوندارىن سالۋ باعدارلاماسىن باياۋ ىسكە اسىرىپ جاتقانىن ايتىپ، سىنادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى