كولەڭكەلى ەكونوميكادان وزبەكستاننىڭ مەملەكەتتىك بيۋدجەتىنە $2,4 ميلليارد زالال كەلدى
تاشكەنت. KAZINFORM - كولەڭكەلى ەكونوميكادان وزبەكستاننىڭ مەملەكەتتىك بيۋدجەتىنە 30 تريلليون سۋم ($2,4 ميلليارد)، ال جالپى ىشكى ونىمگە 135 تريلليون سۋم ($10,8 ميلليارد) زالال كەلدى. مۇنى 2024 -جىلعى ماكروەكونوميكالىق تۇراقتىلىق پەن ەكونوميكالىق دامۋدىڭ باسىم مىندەتتەرى تالقىلانعان كەڭەستە پرەزيدەنت شاۆكات ميرزيەۆ ءمالىم ەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
وزبەكستان باسشىسى اتاپ وتكەندەي، 11 مىڭعا جۋىق قۇرىلىس كومپانياسى (جالپى كومپانيالاردىڭ %41) ەسەپ قۇجاتتارىندا تەك 1 قىزمەتكەر جۇمىس ىستەيتىنىن كورسەتكەن. ءوز كەزەگىندە بۇل كومپانيالار بىلتىر 4 تريلليون سۋمعا ($322 مىڭ) باعالانعان قۇرىلىس جۇمىستارىن جۇرگىزگەن.
«ءبىر نارسەنى ناقتى ءتۇسىنۋ كەرەك - كولەڭكەلى ەكونوميكا ادال جۇمىس ىستەيتىن كاسىپكەرلەر ءۇشىن ۇلكەن كەدەرگى. بۇگىندە جەكە كاسىپ يەلەرى وزدەرىنىڭ زاڭدى قۇقىعىن العا تارتىپ، «ادال باسەكەلەستىك قايدا؟» دەگەن ساۋال قويىپ جاتىر»، - دەدى شاۆكات ميرزيەۆ.
وزبەكستان پرەزيدەنتى وسىنداي ولقىلىقتاردىڭ سالدارىنان قىزمەت كورسەتۋ سالاسىندا - 140 تريلليون سۋم ($11,2 ميلليارد)، قۇرىلىستا - 50 تريلليون سۋم ($4 ميلليارد)، ونەركاسىپتە - 40 تريلليون سۋم ($3,2 دوللار) كولەڭكەدە قالىپ وتىرعانىن ايتتى.
اتالعان ماسەلەلەردى شەشۋ ءۇشىن باس پروكۋراتۋرا جانىنداعى ەكونوميكالىق قىلمىستارعا قارسى كۇرەس دەپارتامەنتىنە ءبىرقاتار قوسىمشا قۇزىرەت بەرىلەدى. دەپارتامەنت بازاسىندا عىلىمي-تالداۋ جانە وقىتۋ ورتالىعى اشىلادى. ول كولەڭكەلى ەكونوميكاعا ىقپال ەتەتىن فاكتورلاردى انىقتاپ، شەتەلدىك تاجىريبە نەگىزىندە ۇسىنىس ازىرلەۋمەن اينالىسادى.
سونىمەن قاتار، باس پروكۋراتۋرادا كولەڭكەلى ەكونوميكاعا قارسى كۇرەس جونىندەگى جەكە باسقارما قۇرىلادى، تيىسىنشە ونىڭ وڭىرلىك بولىمشەلەرى جاساقتالادى.
قوسا كەتسەك، بۇعان دەيىن وزبەكستانداعى كولەڭكەلى ەكونوميكانىڭ كولەمى جالپى ىشكى ءونىمنىڭ 25-تەن 45 پايىزىنا دەيىنگى ارالىقتا ەكەنىن جازىپ ەدىك.
اۆتور
ءاليحان اسقار
