كوكتايعاق: اقمولا وبلىسىندا 2 مىڭ اۆتوكولىك جولدا قالعان
اقمولا وبلىسىندا اۋا رايىنىڭ قولايسىزدىعىنان جولدا قالعان 2 مىڭنان استام اۆتوكولىكتىڭ جۇرۋىنە پاترۋلدىك پوليتسيا قىزمەتكەرلەرى كومەكتەستى، دەپ حابارلايدى Kazinform.
اۋماقتىق پ د باسپا ءسوز قىزمەتىنىڭ مالىمەتىنشە، قاراشانىڭ 22 سىندە كۇن رايىنىڭ بۇزىلۋىنا بايلانىستى ج ا و، ت ج د جانە پ د قىزمەتكەرلەرى بىرلەسىپ، «استانا-پەتروپاۆل»، «كوكشەتاۋ-رۋزايەۆكا»، «كوكشەتاۋ-ومبى» جانە «الماتى-ەكاتەرينبور» باعىتىنداعى اۆتوجولداردا كولىك قوزعالىسىنا شەكتەۋ قويدى.
- وبلىس اۋماعىنداعى بارلىق اۆتوكولىك جولدارىندا 44 پاترۋلدىك پوليتسيا ەكيپاجى، ونىڭ ىشىندە 88 پوليتسيا قىزمەتكەرى كەزەكشىلىك ەتتى. سوعان قاراماستان سول كۇنى 8 جول-كولىك وقيعاسى بولدى. زارداپ شەككەندەر جوق. جالپى، كۇن رايىنىڭ جايسىزدىعىنان جولدا قالعان 2080 اۆتوكولىكتىڭ جۇرۋىنە پاترۋلدىك پوليتسيا قىزمەتكەرلەرى كومەكتەستى، - دەدى ۆەدومستۆودان.
وسى رەتتە، ءتارتىپ ساقشىلارى وبلىس تۇرعىندارى مەن قوناقتارىنا اۋا رايى جايسىز بولعان كۇندەرى الىس جولعا شىقپاۋعا كەڭەس بەرەدى.
ايتا كەتسەك، بۇدان بۇرىن اقمولا وبلىسىندا بوراندا اداسىپ قالعان ءۇش ادام قۇتقارىلعانىن جازعان ەدىك.
