كوشە ونەرپازدارى قايىرشىلار ەمەس - 80 جاستاعى ساكسافونشى
الماتىنىڭ ارباتى ونەرپازداردىڭ ۇلكەن ساحناسىنا اينالعان. كوشەدە ونەر كورسەتەتىندەردىڭ اراسىندا مۋزىكالىق ءبىلىمى بارى دا، جوعى دا كەزدەسەدى. سولاردىڭ ەڭ ۇلكەنى - امانگەلدى قۇمىقبايەۆ. سەكسەنىڭ سەڭگىرىنە شىققان الماتىلىق قاريامەن Kazinform ءتىلشىسى اڭگىمەلەسىپ قايتتى.
- امانسىز با، اتا؟ 10 كۇندەي بولدى ارباتتا ساكسافوننىڭ سىرلى ءۇنى ەستىلمەي قالدى، سىرقاتتانىپ قالعان جوقسىز با؟
- قالىم جاقسى، قالقام، دۇرىس بايقاپسىڭ ارباتقا كەلمەگەنمە ەكى اپتا بولدى. اۋلەتتىڭ ۇلكەنى، قارياسى بولعاندىقتان قۇرمەتتەپ شاقىراتىن جەر كوپ. وعان بارماساڭ تاعى بولمايدى. ەلگە بارىپ قايتتىم. مەن تارازدىڭ تۋماسىمىن. 1982 -جىلى تالعارعا كوشىپ كەلگەنبىز.
- كوشە ونەرپازدارىنىڭ اراسىندا تۋما تالانتتار كوپ. ءسىزدىڭ مۋزىكالىق ءبىلىمىڭىز بار ما؟
- مۋزىكالىق ءبىلىمىم بار. 1964 -جىلى شىمكەنت قالاسىندا ورنالاسقان مۋزىكالىق ۋچەليشەنىڭ ۇرمەلى اسپاپتار كلاسىن ءتامامدادىم. وڭتۇستىك قازاقستاندا، تارازدا تەاتردا جۇمىس ىستەدىم. ءومىر بويى وسى ونەر سالاسىندا ەڭبەك ەتكەن اداممىن.
ادام وتە جاقسى ەستۋ قابىلەتىمەن مۋزىكالىق اسپاپتاردا نوتاسىز ويناۋدى ۇيرەنە الادى. قاراپايىم اككوردتاردى تاڭداپ ۇيرەنۋ انگە سۇيەمەلدەۋ تابۋ ءۇشىن جەتكىلىكتى بولۋى مۇمكىن. ءبىراق كۇردەلى مۋزىكالىق شىعارمالاردى ورىنداۋ ءۇشىن نوتالاردى ءبىلۋ قاجەت. ءوزىم 14 جاسىمنان بەرى ساكسوفونىمدى قولىمنان تۇسىرگەن ەمەسپىن. جالپى، ۇرمەلى اسپاپتىڭ كەز كەلگەنىندە ويناي الامىن.
- كەيبىر ادامدار كوشە مۋزىكانتتارىنا ءناپاقا تابۋ ءۇشىن امالداپ جۇرگەن جاندار دەپ قارايدى...
- ارباتتاعى كوشە ونەرپازدارىن جاعدايى تومەن نەمەسە قايىرشى دەپ قابىلداۋ قاتە پىكىر. مەن ءتۇرلى ساحنادا ونەر كورسەتتىم، ءارتۇرلى كونتسەرتتەرىم بولدى، ءبىراق كوشەنىڭ ورنى بولەك ەكەن. ونى وسى قارتايعان شاعىمدا ءتۇسىندىم. ۇيدە ءتورت قابىرعاعا قاراپ وتىرعىم كەلمەيدى. قالا تۇرعىندارى مەن قوناقتارىنىڭ كوڭىلىن كوتەرىپ، وعان قوسا ازىن- اۋلاق تابىس تاۋىپ جۇرگەنىم راس. ءبىراق، اقشا مەنى قىزىقتىرمايدى. شۇكىر، زەينەتاقى الىپ وتىرمىن، سول دا جەتەدى. تىڭداۋشىلارىمنىڭ قوشەمەتىنەن شابىت الامىن. ۇدايى حالىق الدىندا بولۋ - ءبىزدىڭ تالانتىمىزدى شىڭداي تۇسەدى. ماعان ەلمەن سويلەسىپ، ارالاسىپ وتىرعان ۇنايدى. الماتى - اسەم قالا. ورتالىعى تىپتەن كەرەمەت. وسى ارباتقا كەلىپ سەرگىپ قالامىن.
- رەپەرتۋارىڭىزدا قانشا مۋزىكالىق كومپوزيتسيا بار؟
- رەپەرتۋارىمدا مىڭعا تارتا مۋزىكالىق كومپوزيتسيا بار. كوبىنە رەترو اندەرىن ورىندايمىن. باس كەزىندە ارباتتا ونەر كورسەتۋ ىڭعايسىز سياقتى بولىپ كورىنگەن. كەيىننەن بويىم ۇيرەنىپ كەتتى. جاڭا اتاپ وتكەنىمدەي، سۇيىكتى ىسىمنەن قۋات الامىن. زامانداستارىم ارقامنان قاعىپ قويادى، جاستار جاعى ساكسافوننىڭ ەرەكشەلىگى تۋرالى ايتىپ بەرۋىمدى سۇرايدى، ءوزىڭ سياقتى مەنىمەن سۇحباتتاسقىسى كەلەتىندەر بار. مىنە، وسىنىڭ ءبارى مەنىڭ كوڭىل كۇيىمدى كوتەرەدى.
- وتباسىڭىز، بالالارىڭىز تۋرالى ايتىپ بەرىڭىزشى...
- ەكى ۇل، ءبىر قىزىم بار. كەمپىرىم ەكەۋمىز سولاردان تاراعان نەمەرە، شوبەرەنىڭ قىزىعىن قىزىقتاپ، راحاتىنا بولەنىپ وتىرعان باقىتتى اتا- اجەمىز. ارباتتا تاپقان تابىسىما سول كىشكەنتايلارعا تاتتىلەر ساتىپ الامىن. وسىنىڭ ءوزى زور باقىت. اپالارىڭ شاحماتتى كەرەمەت وينايدى. وسى كۇنگە دەيىن جەڭىپ كورگەن ەمەسپىن.
- ەمەن- جارقىن اڭگىمەڭىزگە راحمەت!
اۆتور
الما مۇقانوۆا
