ەكس-سۋديا جولمانوۆانىڭ ءىسى سوتقا جولداندى

اسا ءىرى كولەمدە الاياقتىق جاسادى دەپ ايىپتالعان بۇرىنعى سۋديا سۆەتلانا جولمانوۆاعا قاتىستى قىلمىستىق ءىس بويىنشا سوتقا دەيىنگى تەرگەپ-تەكسەرۋ اياقتالدى.

تەرگەۋدىڭ مالىمەتىنشە، 2021-جىلدان 2024-جىلعا دەيىنگى كەزەڭدە ول جىلجىمايتىن مۇلىك ساتىپ الۋعا جانە تەندەرلىك جوبالارعا قاتىسۋعا جاردەمدەسۋ سىلتاۋىمەن، الداۋ جانە سەنىمگە قيانات جاساۋ ارقىلى ازاماتتاردىڭ 1 ميلليارد تەڭگەدەن استام قاراجاتتى قولدى قىلعان.

- تەرگەپ-تەكسەرۋ بارىسىندا قىلمىستىق ارەكەتتىڭ 48 ەپيزودى انىقتالىپ، ولار ءبىر ىسكە بىرىكتىرىلدى. تەرگەپ-تەكسەرۋ اياقتالعاننان كەيىن قىلمىستىق ءىس قازاقستان رەسپۋبليكاسى قىلمىستىق كودەكسىنىڭ 190-بابى 4-بولىگىنىڭ 2-تارماعى (اسا ءىرى مولشەردەگى الاياقتىق) بويىنشا ايىپتاۋ اكىسىمەن ءمانى بويىنشا قاراۋ ءۇشىن سوتقا جولداندى، - دەپ حابارلادى باس پروكۋراتۋراسىنان.

ەسكە سالايىق، بىلتىر ەكس-سۋدياسى سۆەتلانا جولمانوۆا ۇستالعانى تۋرالى جازعانبىز.

العاش رەت الماتىلىق سۋديا 2021-جىلى الاياقتىق جاسادى دەگەن كۇدىككە ىلىنگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى