ەكس-سۋديا ايگۇل سايلىبايەۆانىڭ دەنەسىن تۋعان ەلىنە جونەلتۋگە دايىنداپ جاتىر
استانا. KAZINFORM - ا. سايلىبايەۆانىڭ دەنەسى قازاقستانعا جونەلتۋگە دايىندالۋدا. بۇل تۋرالى Kazinform-نىڭ ەۋرووداقتاعى مەنشىكتى تىلشىسىنە مارقۇمنىڭ اعاسى جانات سايلىبايەۆ ايتتى.
ول قازىر گەرمانيادا جۇرگەنىن جانە ايگۇل سايلىبايەۆانى تۋعان ەلىندە جەرلەۋ ءۇشىن دەنەسىن الماتىعا جونەلتۋ ماسەلەسىمەن اينالىسىپ جاتقانىن ايتتى.
ەسكە سالا كەتسەك، گەرمانيادا ەكس-سۋديا ايگۇل سايلىبايەۆانىڭ زورلىق بەلگىلەرى بار ءمايىتى تابىلعانىن جازعان بولاتىنبىز.
بۇعان دەيىن 40 جاستاعى ا. سايلىبايەۆا استانانىڭ سارىارقا اۋدانىندا سۋديا بولىپ قىزمەت اتقارسا، سوڭعى ۋاقىتتا گەرمانيانىڭ باتىسىنداعى بەنسحايم قالاسىندا كۇيەۋى، قىزى جانە ەنەسىمەن بىرگە تۇرعان.
4-ماۋسىم كۇنى تاڭەرتەڭ قىزىن بالاباقشاعا اپارعان. سودان بەرى ونى ەشكىم كورمەگەن. كەيىن ونىڭ دەنەسى قالا شەتىندەگى ەرلاچە كارەرىنەن تابىلدى.
نەمىستىڭ BILD باسىلىمىنىڭ حابارلاۋىنشا، ايەلدىڭ مايىتى پوليەتيلەن قاپتا بولعان، ول ءولىم الدىندا زورلىق-زومبىلىققا ۇشىراعان. تەرگەۋگە گەسسەن فەدەرالدى شتاتىنان 35 تەرگەۋشى قاتىسۋدا.
وتانداسىمىزدىڭ جوعالعانى تۋرالى ونىڭ اعاسى قانات سايلىبايەۆ حابارلادى.
ول اپكەسىنىڭ بۇرىن تۇرمىستىق زورلىق-زومبىلىق تۋرالى شاعىمدانعانىن ايتتى.
ا. سايلىبايەۆانىڭ مايىتىن بەرۋ پروتسەسىنىڭ باستالعانىن Kazinform تىلشىسىنە تەرگەۋ ءجۇرىپ جاتقان گەرمانيانىڭ دارمشتادت قالاسىنىڭ پروكۋراتۋراسى دا راستادى.
