كۋرس ساتاتىن بلوگەرلەرگە شەكتەۋ قويىلادى - كوميتەت
استانا. KAZINFORM — ءتۇرلى كۋرس ساتاتىن بلوگەرلەرگە شەكتەۋ قويىلادى. بۇل تۋرالى س ي م تۇتىنۋشىلاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى سەرىك قۇسايىنوۆ ايتتى.
- قازىرگى قولدانىستاعى (تۇتىنۋشىنىڭ قۇقىعىن قورعاۋ تۋرالى - رەد.) زاڭ وقىتۋ كۋرستارى قىزمەتىنە تارالمايدى. جاڭا زاڭ وقىتۋ كۋرستارىنا دا جۇرەتىن بولادى، - دەدى ول.
«تۇتىنۋشىلاردىڭ قۇقىقتارىن قورعاۋ: بيزنەس، مەملەكەت جانە قوعام ديالوگى» اتتى فورۋمدا.
سپيكەر زاڭ نورمالارى ناقتى قالاي جۇمىس ىستەيتىنىن مىسالمەن ءتۇسىندىردى.
- ەندى ناقتى قانداي جاعدايلاردى رەتتەيتىنىنە كوشەيىك. راسىمەن قازىر ازاماتتارىمىز ءتۇرلى تۇلعالار ۇسىناتىن كۋرستاردى ساتىپ الادى. بلوگەرلەر دەپ تە اتاپ جاتادى، ءبىر سوزبەن ايتقاندا ولار وزدەرىن ناقتى ءبىر تاقىرىپتى جەتە بىلەتىن ادام سانايدى. ولاردىڭ تانىستىرىلىمىن تىڭداپ وتىرعان كەزدە ساتىپ الۋشى ءومىرى ءبىر ساتتە وزگەرىپ، جارقىن كەزەڭ باستالىپ كەتەتىندەي اسەردە بولادى. الايدا وقۋدان سوڭ شىنايى ومىرىندە ونداي وزگەرىس بولمايدى. وسىدان كەيىن ولار شاعىمدانادى. سوندىقتان زاڭ جوباسىندا ءبىز وسى سەكىلدى جاعدايلاردى ەسكەردىك. وعان ساي قىزمەت كورسەتۋشىگە ونىڭ قىزمەتىن ساتىپ الۋشىعا سول كۋرستى وقىعان سوڭ ءومىرى كۇرت جاقسارىپ كەتەتىنى جايلى ۋادە بەرۋىنە تىيىم سالىنادى. بۇل شىن مانىندە تۇتىنۋشىنى اداستىرۋ، الداۋ بولىپ سانالادى، - دەپ ءتۇيدى ءسوزىن سەرىك قۇسايىنوۆ.
ەسكە سالا كەتسەك، ەلىمىزدە 2023-جىلدىڭ قىركۇيەگىنەن بەرى تۇتىنۋشىلاردىڭ قۇقىعىن قورعاۋ تۋرالى جاڭا زاڭ جوباسى قارالىپ جاتىر. قازىر ول ءماجىلىستىڭ قاراۋىندا.
جاڭا زاڭ قابىلدانعان سوڭ تۇتىنۋشى 4 ساتىلى شاعىمدانۋ كەزەڭدەرىنەن وتپەستەن، بىردەن سوتقا جۇگىنە الاتىن بولادى.
تۇتىنۋشىلار قۇقىعىن قورعاۋ ومبۋدسمەنى ينستيتۋتى قۇرىلادى.
ەلەكتروندىق ساۋدا سالاسىندا دا وزگەرىس بولادى.
اۋە تاسىمالى سالاسىندا بيلەت قۇنىن قايتارىپ الۋ مۇمكىندىگىن بەرەتىن نورما دا ەنگىزىلۋى مۇمكىن.
اقاۋى بار جاڭا كولىكتى قايتارىپ بەرۋگە كەدەرگى كەلتىرەتىن نورما جويىلادى.
