ەكرەم يماموعلى تۇركيا پرەزيدەنتىنە كانديدات رەتىندە ۇسىنىلدى
استانا. KAZINFORM - جەكسەنبى، 23 -ناۋرىز كۇنى تۇركيانىڭ وپپوزيتسيالىق حالىقتىق-رەسپۋبليكالىق پارتياسى (ح ر پ) قىزمەتىنەن ۋاقىتشا شەتتەتىلگەن جانە قاماۋعا الىنعان ىستانبۇل قالاسىنىڭ مەرى ەكرەم يماموعلىنى پرەزيدەنتتىككە كانديدات ەتىپ ۇسىندى، دەپ حابارلايدى DW اقپارات اگەنتتىگى.
ح ر پ پرايمەريزىنە بارلىعى 15 ميلليون تۇرىك ازاماتى قاتىستى - بۇل ەلدەگى بارلىق تىركەلگەن سايلاۋشىنىڭ تورتتەن ءبىر بولىگىن قۇرايدى. ولاردىڭ 13,2 ميلليونى جالعىز كانديدات بولعان يماموگلىعا قولداۋ ءبىلدىردى.
پارتيا ءتوراعاسى وزگۋر وزەل تۇركيانىڭ قازىرگى پرەزيدەنتى رەجەپ تاييپ ەردوعاندى مەرزىمىنەن بۇرىن پرەزيدەنت سايلاۋىن وتكىزۋ تۋرالى شەشىم قابىلداۋعا جانە ەكرەم يماموعلىمەن باسەكەلەسۋگە شاقىردى.
ءدال سول كۇنى وپپوزيتسيانىڭ ون مىڭداعان جاقتاسى ىستانبۇل قالالىق اكىمشىلىگىنىڭ الدىنا جينالىپ، ەردوعاننىڭ قارسىلاسىن ساياسي استارلى قۋدالاۋعا نارازىلىق ءبىلدىردى.
- يماموگلۋ ءبىر جاعىنان تۇرمەدە وتىرسا، ەكىنشى جاعىنان پرەزيدەنتتىك جولىندا ءجۇر، - دەپ كەلتىردى ار وزەلدىڭ ميتينگىدە ايتقان سوزدەرىن.
پرەزيدەنتتىككە جاڭادان ۇمىتكەردىڭ زايىبى ديلەك كايا يماموعلى دا نارازىلىق بىلدىرۋشىلەر الدىندا ءسوز سويلەدى.
شەرۋشىلەر توسقاۋىل تۇرعىزۋعا ارەكەتتەنىپ، پوليتسيامەن قاقتىعىستى، دەپ حابارلايدى Milliyet باسىلىمى. ونىڭ مالىمەتىنشە، سالدارىنان 66 نارازىلىق ءبىلدىرۋشى ۇستالىپ، بەس پوليتسيا قىزمەتكەرى جاراقات الدى.
بۇعان دەيىن ىستانبۇل مەرى ەكرەم يماموعلى ارنايى وپەراتسيا كەزىندە ۇستالعانىن جازعان بولاتىنبىز.
تۇركيانىڭ ءى ءى م يماموعلىنى قىزمەتىنەن ۋاقىتشا شەتتەتتى.
