كۇرشىم اۋدانىنداعى التىن ءوندىرۋ فابريكاسىنىڭ جۇمىسى توقتامايتىن بولدى

كۇرشىم اۋدانى مارالدى اۋىلىنىڭ ماڭىنداعى التىن ءوندىرۋ فابريكاسىنىڭ جۇمىسىن توقتاتۋعا ەشقانداي نەگىز جوق. ياعني، فابريكا ارى قاراي دا جۇمىس ىستەيدى. ءبىراق ءوندىرىستىڭ قاۋىپسىزدىگى قاتاڭ باقىلاۋعا الىنباق.

بۇل تۋرالى ق ر ەكولوگيا جانە تابيعي رەسۋرستار ۆيتسە-ءمينيسترى مانسۇر وشۋربايەۆ، ونەركاسىپ جانە قۇرىلىس ۆيتسە-ءمينيسترى يران شارحان جانە شىعىس قازاقستان وبلىسى اكىمىنىڭ ءبىرىنشى ورىنباسارى نۇرىمبەت ساقتاعانوۆتىڭ مارالدى اۋىلىنىڭ تۇرعىندارىمەن كەزدەسۋى بارىسىندا ايتىلدى.

«ۆيتسە-مينيسترلەر، ش ق و اكىمىنىڭ ءبىرىنشى ورىنباسارى جانە وبلىستىق باسقارما باسشىلارىنان قۇرالعان توپ مارالدى اۋىلىنا بارىپ، سالىنىپ جاتقان التىن ءوندىرۋ فابريكاسىنىڭ جۇمىسىمەن تانىستى. فابريكا باسشىلىعىنا ەگەر تۇرعىندارعا، قورشاعان ورتاعا زالال تيەتىن بولسا، ەكولوگيالىق جانە قاۋىپسىزدىك تالاپتارى ورىندالماسا، زاڭ اياسىندا قاتاڭ شارالار قولدانىلاتىنىن، ءتىپتى زاۋىت جۇمىسى توقتاتىلاتىنى قاتاڭ ەسكەرتىلدى. ودان كەيىن توپ جەرگىلىكتى تۇرعىندارمەن كەزدەسىپ، ولاردىڭ ءوتىنىش-تالاپتارىن تىڭدادى. نۇرىمبەت ساقتاعانوۆ بارلىعى دا زاڭ اياسىندا شەشىلۋى كەرەك ەكەنىن اتاپ ءوتتى. زاڭ بويىنشا ەشقانداي نەگىز بولماعاندىقتان فابريكا جۇمىسى توقتامايدى. ەڭ ماڭىزدىسى - حالىقتىڭ جاعدايى جانە زاڭ. سوندىقتان ەكولوگيالىق جاعداي قاتاڭ باقىلاۋدا بولادى، ال زاڭسىز قازبا جۇمىستارىن جۇرگىزۋگە جول بەرىلمەيدى»، - دەپ حابارلادى ش ق و اقپارات ورتالىعىنان.

جيىن سوڭىندا ۆيتسە-مينيسترلەر الداعى ۋاقىتتا مارالدىلىقتارمەن تاعى دا كەزدەسەتىنىن مالىمدەدى.

ال تۇرعىندار ايتىلعان ماسەلەلەرگە تۇسىنىستىك تانىتتى.

ەسكە سالساق، وسىعان دەيىن مارالدى اۋىلىنىڭ تۇرعىندارى التىن ءوندىرىسىن اشۋعا قارسى شىققانى حابارلانعان.

ش ق و اكىمدىگى التىن كەنىشىنىڭ داۋلى ماسەلەسى زاڭ شەڭبەرىندە عانا شەشىلۋى تيىستىگىن مالىمدەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى