ۋكراينادان ەۆاكۋاتسيالانعان وتانداستارىمىزدىڭ جارتىسىنا جۋىعى قايتادان سول ەلگە ورالعان
استانا. KAZINFORM - ۋكراينادان ەۆاكۋاتسيالانعان وتانداستارىمىزدىڭ جارتىسىنا جۋىعى قايتادان سول ەلگە ورالعان. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى.
«ۋكراينادا سوعىس باستالعان كەزدە قازاقستان ازاماتتارىن ەۆاكۋاتسيالادىق. ونىڭ جارتىسىنا جۋىعى قايتادان ۋكرايناعا قايتىپ كەتتى. قازىر ولاردىڭ ومىرىنە قاۋىپ ءتونىپ تۇر ما، جوق پا بىلمەيمىز. ويتكەنى، سوعىس بولىپ جاتقانىن بىزدەن جاقسى بىلەدى. ونى قايتا-قايتا ايتا بەرۋدىڭ قاجەتى جوق. ءار ادام قاۋىپسىزدىگىنە ءوزى جاۋاپ بەرەدى. ءبىراق ەلشىلىكتىڭ مىندەتى - ازاماتتار حابارلاسسا، ولارعا كومەكتەسۋ»، - دەدى ايبەك سمادياروۆ بۇگىن ۆەدومستۆودا وتكەن اپتالىق بريفينگتە ب ا ق وكىلدەرىنىڭ ساۋالىنا وراي.
28-ناۋرىز كۇنى ەلىمىزدىڭ سىرتقى ىستەر مينيسترلىگى ۋكراينانىڭ ودەسسا جانە حاركوۆ وبلىستارىنداعى جاعدايدىڭ شيەلەنىسۋىنە جانە قاۋىپتىڭ ارتۋىنا بايلانىستى قازاقستان ازاماتتارىنا وسى ايماقتاردان كەتۋ مۇمكىندىگىن قاراستىرۋدى ۇسىنعان ەدى.
