كۇرە جولدا ۇزىلگەن تاعدىرلار: اتىراۋدا جول اپاتىنىڭ كوبەيۋىنە نە سەبەپ

وبلىس اكىمى اپپاراتى قاۋىپسىزدىك جانە قۇقىقتىق ءتارتىپتى قامتاماسىز ەتۋ ءبولىمىنىڭ باسشىسى لەيلا بەردىعالييەۆانىڭ مالىمەتىنشە، جول-كولىك وقيعاسىنان زارداپ شەككەندەر سانى بىلتىرعىدان 150,6 پايىزعا وسكەن.

— بيىل 11 ايدا 812 جول-كولىك وقيعاسى تىركەلدى. سونىڭ سالدارىنان 1213 ادام زارداپ شەگىپ، جاراقات الدى. ال 91 ادام قازا تاپتى. كولىك جۇرگىزۋشىلەرى 145 جاياۋ جۇرگىنشىنى قاققان. جول بويىندا 180 مارتە بەتپە-بەت سوقتىعىسقان، — دەيدى لەيلا بەردىعاليەۆا.

ونىڭ ايتۋىنشا، جۇرگىزۋشىلەردىڭ جاياۋ جۇرگىنشىلەردى قاعۋ دەرەگى اتىراۋ قالاسىنداعى قۇرمانعازى، ل. ۆلاديميرسكيي كوشەلەرىندە، سونداي-اق «نۇرسايا» شاعىناۋدانىندا ءجيى تىركەلگەن.

— جول-كولىك وقيعاسىنان كامەلەتكە تولماعان 330 جاس ءوسپىرىم زارداپ شەكتى. ونىڭ ىشىندە 9 بالا قازا تاۋىپ، 321 ءى ءتۇرلى جاراقات الدى. ءتورت جەتكىنشەكتى جاياۋ جۇرگىنشىلەرگە ارنالعان جولاقتا كولىك قاققان. ال ەكى بالا جول اپاتىنان، تاعى ۇشەۋى ءارتۇرلى جاعدايدا قازا تاپتى، — دەيدى سپيكەر.

جەرگىلىكتى پوليتسيا قىزمەتى باسقارماسى باستىعىنىڭ ورىنباسارى ادىلبەك شاحمەتوۆتىڭ پىكىرىنشە، جول-كولىك وقيعاسىنا ادام فاكتورى اسەر ەتەدى.

— ادام فاكتورى — الدىمەن جۇرگىزۋشىلەر. ولاردىڭ جول ەرەجەسىن بۇزۋىنا بىرنەشە سەبەپ اسەر ەتەدى. بىرىنشىدەن، جۇرگىزۋشىلەر ءوزىنىڭ دە، كولىك سالونىنداعى جولاۋشىلاردىڭ ءدا ومىرىن ساقتاۋ تۇرعىسىندا جاۋاپكەرشىلىكتى سەزىنبەيدى. ەكىنشىدەن، دىتتەگەن جەرىنە تەز جەتۋدى ويلاپ، جىلدامدىقتى شامادان تىس اسىرادى. ۇشىنشىدەن، كولىك ايداپ كەلە جاتىپ، ءموبيلدى تەلەفونمەن سويلەسەدى. تورتىنشىدەن، جولداعى مانيەۆر جاساۋ تالاپتارىن بۇزادى. بەسىنشىدەن، الداعى كولىكتى باسۋ وزۋ قاعيداسىن بۇزادى. التىنشىدان، الكوگولدىك ىشىمدىك ءىشىپ، رۋلگە وتىرۋ، — دەيدى ادىلبەك شاحمەتوۆ.

وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بيىل جەرگىلىكتى پوليتسەيلەر ءۇشىن «كيبەر-شەريف» اقپاراتتىق كەشەنىمەن قامتىلعان 28 كولىك ساتىپ الىنعان.

بۇل قۇرىلعىمەن اقپان ايىنان بەرى كولىك قوزعالىسىنا باقىلاۋ جۇرگىزەدى.

— بۇل — جول ەرەجەسىن بۇزاتىن، قاۋىپ توندىرەتىن جۇرگىزۋشىلەردى تەز انىقتايتىن كەشەن. اتالعان قۇرىلعىنىڭ بەينەكامەراسىمەن 360 گرادۋستاعى كورىنىستى باقىلاۋعا بولادى. ءبىر مەزگىلدە 50 اۆتوكولىكتىڭ جىلدامدىعىن قاداعالاۋعا مۇمكىندىك بار. جىلدامدىقتى شەكتەن تىس اسىرعان، قارسى باعىتقا شىققان، كورىنبەيتىن مەملەكەتتىك تىركەۋ نومىرلەرى تاعىلعان، ۇرلانعان نەمەسە بورىشكەرلەر جۇرگىزگەن كولىكتەر اۆتوماتتى تۇردە انىقتالادى. قۇقىق بۇزۋشىلىق دەرەكتەرى پوليتسيا قىزمەتكەرلەرىنىڭ قاتىسۋىنسىز، اۆتوماتتى تۇردە بازاعا تۇسەدى. ەلەكتروندى حاتتاما قاۋلىسى 1 اپتا ىشىندە كولىك يەلەرىنىڭ مەكەن جايىنا جىبەرىلەدى، — دەيدى دەپارتامەنت باستىعى نۇرحات ورازبايەۆ.

ونىڭ دەرەگىنە سۇيەنسەك، پاترۋلدىك پوليتسيا قىزمەتكەرلەرىنە 4 اۋە درونى، 8 «وراكۋل- ينسايت» موبيلدى-تاسىمالاۋ قۇرىلعىسى بەرىلگەن. ال 15 باعاناعا «ترافيك-سكانەر» ستاتسيونارلىق جىلدامدىق ولشەگىش قۇرىلعىسى ورناتىلعان.

اتىراۋ وبلىسىنىڭ اكىمى سەرىك شاپكەنوۆتىڭ پىكىرىنشە، جول-كولىك وقيعالارىنىڭ الدىن الۋعا باسىمدىق بەرىلۋى كەرەك. مۇنداي ءىس-شارا اسىرەسە اتىراۋ قالاسىندا كوبىرەك قولعا الىنعانى ءجون.

— جول قاۋىپسىزدىگىن قامتاماسىز ەتۋ ماقساتىندا قاجەتتى قۇرال- جابدىقتار، ارنايى كولىكتەر ساتىپ الىندى. ءبىراق ءالى كۇنگە دەيىن ستاتيستيكالىق كورسەتكىش كوڭىل كونشىتپەيدى. ەڭ وكىنىشتىسى، جول اپاتى قۇرباندارىنىڭ باسىم كوپشىلىگى — بالالار. وسىعان بايلانىستى ۆەدومستۆوارالىق كوميسسيا جاياۋ جۇرگىنشىلەر مەن جول قوزعالىسىنداعى قاۋىپسىزدىكتى قامتاماسىز ەتۋ ءۇشىن ناقتى ۇسىنىستار ازىرلەۋى قاجەت. تالداۋ جۇرگىزۋگە جانە ناقتى شەشىم قابىلداۋعا قاجەتتى اقپارات بار، — دەيدى سەرىك شاپكەنوۆ.

ەسكە سالا كەتەلىك، بۇدان بۇرىن اتىراۋدا جىل باسىنان بەرى كولىك رولىنە وتىرعان 732 ماس جۇرگىزۋشى ۇستالعانىن حابارلاعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى