كەنەسارى حاننىڭ ءولىمى ءۇشىن كەشىرىم سۇراعان قىرعىزستاندىق ءانشى ۇستالدى
استانا. KAZINFORM - قىرعىزستاننىڭ مەملەكەتتىك ۇلتتىق قاۋىپسىزدىك كوميتەتى ۇلتارالىق ارازدىقتى قوزدىردى دەگەن كۇدىكتى ۇستالعانىن حابارلادى. جەرگىلىكتى ب ا ق مالىمەتىنشە، اڭگىمە ءانشى قايرات پريمبەرديەۆ تۋراسىندا بولىپ وتىر.
«ناسىلدىك، ەتنيكالىق، ۇلتتىق جانە ءدىني ارازدىقتى قوزدىرۋ» بابى بويىنشا قوزعالعان قىلمىستىق ءىس اياسىندا 1985-جىلى تۋعان قىرعىزستان ازاماتى انىقتالعان. ۇلتتىق قاۋىپسىزدىك كوميتەتى مالىمەتىنشە، كۇدىكتى YouTube-ارنالارىنىڭ بىرىندە ۇلتارالىق ارازدىقتى قوزدىرۋعا باعىتتالعان مالىمدەمەلەر جاساعان.
انشىگە قاتىستى ەلدەن كەتپەۋ تۋرالى قولحات تۇرىندەگى بۇلتارتپاۋ شاراسى تاڭدالعان.
«قازىر قاجەت تەرگەۋ ءىس-شارالارى جۇرگىزىلىپ جاتىر. م ۇ ق ك قىرعىزستان زاڭناماسىنا سايكەس ناسىلدىك، ەتنيكالىق، ۇلتتىق، ءدىني نەمەسە وڭىرلىك ارازدىقتى قوزدىرۋ ارەكەتتەرى ءۇشىن 10 جىلعا دەيىن باس بوستاندىعىنان ايىرۋ جازاسى قاراستىرىلعانىن ەسكەرتەدى»، - دەدى ۆەدومستۆو وكىلدەرى.
ەسكە سالايىق، بۇعان دەيىن قىرعىزستاندىق ءانشى قايرات پريمبەرديەۆ كەنەسارى حاننىڭ ءولىمى ءۇشىن كەشىرىم سۇراپ، بۇل مالىمدەمە الەۋمەتتىك جەلىلەردە قىزۋ پىكىرتالاس تۋعىزعان ەدى.
