كۇن سايىن شۇجىق جەسە، اعزادا نە بولادى؟ دارىگەر جاۋابى
استانا. KAZINFORM - كوپ ادام تاڭعى اسقا شۇجىق بۋتەربرودتاردى جەۋدى ۇناتادى. الايدا بۇل ادەتتىڭ دەنساۋلىققا اسەرى تۋرالى كوبىمىز ويلاي بەرمەيمىز. ەندوكرينولوگ ەكاتەرينا كازاچكوۆا شۇجىق ونىمدەرىن كۇندەلىكتى تۇتىنۋدىڭ قاۋپى تۋرالى ايتىپ بەردى، - دەپ حابارلايدى «گازەتا. Ru».
شۇجىق ونىمدەرىنىڭ دەنساۋلىققا قانداي زيانى بار؟
جوعارى قان قىسىمى مەن جۇرەك اۋرۋلارى؛
شۇجىق ونىمدەرىنىڭ قۇرامىندا ناتري (تۇز) مولشەرى وتە كوپ. تۇزدىڭ ارتىق بولۋى قان قىسىمىنىڭ كوتەرىلۋىنە، ال بۇل جۇرەك-قان تامىرلارى اۋرۋلارىنىڭ قاۋپىن ارتتىرادى.
اسقازان-ىشەك جولدارىنىڭ بۇزىلۋى
كولباسا مەن سوسيسكانىڭ قۇرامىندا كونسەرۆانتتار مەن ءتۇرلى قوسپالار بولادى. بۇل زاتتار ىشەك ميكروفلوراسىنا كەرى اسەر ەتىپ، اعزانىڭ جالپى جاعدايىن ناشارلاتۋى مۇمكىن.
حولەستەريننىڭ جوعارىلاۋى
وڭدەلگەن ەت ونىمدەرىندە قانىققان ماي كوپ. بۇل «جامان» حولەستەريننىڭ دەڭگەيىن كوتەرىپ، جۇرەك-قان تامىرلارى اۋرۋلارىنا سەبەپشى بولۋى مۇمكىن.
قاتەرلى ىسىك قاۋپىنىڭ جوعارىلاۋى
عالىمدار وڭدەلگەن ەت پەن كەيبىر قاتەرلى ىسىك تۇرلەرى اراسىنداعى بايلانىستى انىقتادى. زەرتتەۋ ناتيجەلەرىنە سۇيەنسەك، كۇن سايىن از مولشەردە بولسا دا شۇجىق تۇتىنۋ - توق ىشەك قاتەرلى ىسىگىنىڭ دامۋ ىقتيمالدىعىن ارتتىرۋى مۇمكىن.
زات الماسۋ مەن گورمونالدى تەڭگەرىمنىڭ بۇزىلۋى
شۇجىق ونىمدەرىندە پايدالى زاتتار از، ءبىراق كالوريا كوپ. بۇل سالماقتىڭ ارتۋىنا، تەرى، شاش جانە تىرناق ماسەلەلەرىنە اكەپ سوقتىرۋى مۇمكىن.
«سونىمەن قاتار شارۋا قوجالىقتارىندا جانۋارلارعا گورموندار مەن انتيبيوتيكتەر بەرىلەدى. بۇل زاتتار وڭدەۋ كەزىندە جويىلمايدى، ال ادام اعزاسىنا ءتۇسىپ، گورمونالدى تەڭگەرىمنىڭ بۇزىلۋىنا اكەپ سوقتىرادى»
نە ىستەۋ كەرەك؟
شۇجىق ونىمدەرىنەن تولىق باس تارتۋدىڭ قاجەتى جوق، ءبىراق شۇجىق ونىمدەرىن اپتاسىنا 1-2 رەت قانا تۇتىنۋعا تىرىسىڭىز.
ءونىمدى الماستىرۋدىڭ جولدارى:
قايناتىلعان تاۋىق ەتى نەمەسە پىسىرىلگەن كۇركەتاۋىق - اقۋىزعا باي، ال تۇزى مەن مايى از.
كوكونىس پاستالارى نەمەسە حۋمۋس - پايدالى جانە ءدامدى تاڭداۋ.
