كەلەسى جىلى 40 مىڭنان استام قازاقستاندىق اسكەرگە شاقىرىلادى
استانا. KAZINFORM - كەلەر جىلى مەرزىمدى اسكەري مىندەتتى وتەۋ جاسىنداعى 41706 قازاقستان ازاماتى وتان الدىنداعى بورىشىن وتەۋگە شاقىرىلادى.
قورعانىس مينيسترلىگى مەرزىمدى اسكەري قىزمەتتەگى اسكەري قىزمەتشىلەردى زاپاسقا شىعارۋ جانە ق ر ازاماتتارىن 2025-جىلعى ناۋرىز-ماۋسىم جانە قىركۇيەك-جەلتوقسان ايلارىندا كەزەكتى مەرزىمدى اسكەرگە شاقىرۋ تۋرالى پرەزيدەنت جارلىعىن ىسكە اسىرۋ بارىسىندا ۇكىمەت قاۋلىسىنىڭ جوباسىن ازىرلەدى. قۇجات جوباسى «اشىق ن ق ا» پورتالىندا جاريالاندى.
- وبلىستارمەن قاتار استانا، الماتى جانە شىمكەنت قالالارىنىڭ اكىمدەرىنە زاڭنامادا بەلگىلەنگەن تارتىپپەن اسكەرگە شاقىرۋ كوميسسيالارىنىڭ جۇمىسىن ۇيىمداستىرۋ، ونىڭ ىشىندە 2025-جىلعى ناۋرىز-ماۋسىم جانە قىركۇيەك-جەلتوقسان ايلارىندا اسكەرگە شاقىرۋدى كەيىنگە قالدىرۋعا نەمەسە ودان بوساتۋعا جاتپايتىن 18-27 جاس ارالىعىنداعى 41706 ەر ازاماتتى اسكەرگە شاقىرۋ، اسكەرگە شاقىرۋ پۋنكتتەرىن مەديتسينالىق قامتاماسىز ەتۋ تاپسىرىلدى، - دەلىنگەن قۇجاتتا.
سونىمەن قاتار اسكەرگە شاقىرۋ ماۋسىمىنا بىرنەشە قۇزىرلى مەملەكەتتىك ورگاندار قاتىسادى. اتاپ ايتقاندا ىشكى ىستەر مينيسترلىگى اسكەرگە شاقىرىلۋشىلاردى جيناۋ جانە جەتكىزۋدە پوليتسيا قىزمەتكەرلەرىنىڭ كۇشەيتىلگەن كەزەكشىلىگىن جۇزەگە اسىرادى.
كولىك مينيسترلىگى زاپاسقا شىعارىلعان مەرزىمدى قىزمەتتەگى اسكەري قىزمەتشىلەر مەن اسكەرگە شاقىرىلۋشىلاردى تاسىمالداۋدى قامتاماسىز ەتەدى.
سونداي-اق، قورعانىس مينيسترىلىگى، ىشكى ىستەر مينيسترلىگى جانە توتەنشە جاعدايلار مينيسترلىگى مەرزىمدى اسكەري قىزمەتكە شاقىرىلعان ازاماتتاردى، سونداي-اق زاپاسقا شىعارىلعان اسكەري قىزمەتشىلەردى تاسىمالداۋشىلاردى رەسپۋبليكالىق بيۋجەتتە كوزدەلگەن قاراجات شوتتارى نەگىزىندە تاسىمالداۋعا ارنالعان شىعىندى وتەيدى.
قۇجات جوباسى 2024-جىلعى 13-جەلتوقسانعا دەيىن قوعامدىق تالقىلاۋعا ۇسىنىلىپ وتىر.
ايتا كەتسەك، 2025-جىلى 915 زاپاستاعى وفيتسەر اسكەري قىزمەتكە شاقىرىلادى.
ەسكە سالا كەتەيىك، ەندى ەلىمىزدە اسكەرگە شاقىرۋ، بوساتۋ جانە اسكەري مىندەتتى وتەۋدى كەيىنگە قالدىرۋ تۋرالى حابارلاما sms ارقىلى جەتكىزىلەدى.
