كەلەر جىلدان باستاپ «9-20-25» باسپانا باعدارلاماسى ىسكە قوسىلادى - سمايىلوۆ

بۇگىن سەناتتىڭ جالپى وتىرىسىنان كەيىن تىلشىلەر ۇكىمەت باسشىسىنان «9-20-25» تۇرعىن ءۇي باعدارلاماسى قاشان ىسكە قوسىلاتىنىن سۇرادى.

«تۇرعىندار تاراپىنان «7-20-25» باعدارلاماسىنا كەڭىنەن سۇرانىس بولدى. ءبىراق بۇل باعدارلامانى ىسكە اسىرۋعا قاراجات كەرەك. ۇلتتىق بانك ءوزىنىڭ ءليميتىن قويعان ەدى. بۇل ليميت سۇرانىس تۇرعىسىنان جەتكىلىكسىز. ۇلتتىق بانك مۇنداي شەكتەۋ قويعاننان كەيىن ۇكىمەت اياسىندا، سونداي- اق وتباسى بانك جانە «بايتەرەك» حولدينگى بىرلەسىپ قوسىمشا باعدارلاما ازىرلەپ جاتىرمىز. ول-«9-20-25» باعدارلاماسى»، - دەدى ءا. سمايىلوۆ.

ونىڭ ايتۋىنشا، جاڭا باعدارلاما بويىنشا 25 جىلعا 9 پايىزدان يپوتەكالىق نەسيە بەرىلەدى.

«قازىرگى جاعدايدا 9 پايىز دەگەن تومەن مولشەرلەمە سانالادى. سونى ىسكە اسىرۋ ءۇشىن ءتيىستى ەسەپ- قيساپتى جاساپ وتىرمىز. وعان جىل سايىن 150 ميلليارد تەڭگە كەرەك جانە 8 مىڭ وتباسى نەمەسە ادامعا وسى يپوتەكانى الۋعا مۇمكىندىك بەرىلەدى. ول ءۇشىن 100 ميلليارد تەڭگەنى نارىقتان تارتۋىمىز قاجەت، ال وتباسى بانك ءوزىنىڭ تازا تابىسىنان 50 ميلليارد تەڭگە ءبولۋى ءتيىس. وسى قاراجاتتى قوسىپ، 9 پايىزدىق ستاۆكاعا شىعۋ كەرەك. بۇل باعدارلاما نەگىزىنەن جاستارعا ارنالادى دەپ سانايمىن»،-دەدى ۇكىمەت باسشىسى.

وسى ورايدا ول باعدارلاما جاقىن ارادا ىسكە قوسىلاتىنىن ايتتى.

«كەلەر جىلى وسى باعدارلاما جۇزەگە اسادى»، - دەپ ناقتىلادى پرەمەر- مينيستر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى