كۇلكى كۇنى قايدان شىققان

الەمنىڭ كوپ ەلى مۇنى ونەر دەپ بىلەدى. سول سەبەپتى بۇل كۇندى ەرەكشە اتاپ وتەدى. ءتىپتى كەي جەردە كۇلكى كۇنى ءبىر ەمەس، ەكى كۇن تويلانادى. مىسالعا، گرەكتەر كۇلكى كۇنى بىرەۋدى الداي السا، جىل بويى ساتتىلىك سەرىك بولادى دەپ سەنەدى.

كۇلكى كۇنى فرانسيادان باستاۋ الادى. ەۋروپانىڭ كەي ەلدەرى بۇرىن جاڭا جىلدى 25-ناۋرىزدان 1- ساۋىرگە دەيىن تويلاپ كەلدى. الايدا 1582 -جىلى فرانسيا كورولى كارل Ⅸ جاڭا كۇنتىزبە ەنگىزىپ، جاڭا جىلدى 1-قاڭتارعا اۋىستىردى. ءبىراق كەي ادامدار وزگەرىستى قابىلداماي، مەرەكەنى 1-ساۋىردە تويلاۋىن جالعاستىردى. بىربەتكەي ادامداردى قوعام «ءساۋىر اقىماقتارى» دەپ اتاپ كەتكەن. سودان وسى كۇنى ءازىل-قالجىڭ ايتۋ قالىپتى داستۇرگە اينالدى.

ۋاقىت وتە كەلە سول ءۇردىس باسقا ەلدەرگە كەڭ تارالدى. فرانسيا دەمەكشى، فرانسۋزدار قازىر بۇل كۇندى «ءساۋىر بالىعى» دەپ اتايدى. ەرەكشەلىگى سول، جۇرت قاعازدان بالىقتىڭ سۋرەتىن قيىپ الىپ، بايقاتپاي بىرەۋدىڭ ارقاسىنا جاپسىرىپ قويادى. ەگەر ونى الگى ادام بايقاماسا، كەلەكە بولىپ جۇرەدى.

كەي ەلدەر كۇلكى كۇنىن بىرنەشە كۇن تويلايدى

ۇلى بريتانيادا ءازىل ارالاس اڭگىمەنى تەك تۇسكە دەيىن ايتۋعا رۇقسات. ەگەر تۇستەن كەيىن بىرەۋ قالجىڭداسا، ونىڭ ءوزى كۇلكىگە قالادى. شوتلانديالىقتار مەرەكەنى ەكى كۇن تويلايدى. بۇگىن جۇرت ءبىر-بىرىمەن وتىرىك ارالاس حات جازىسىپ، الداپ سوعادى. ال ەرتەسىنە قالجىڭ جالعاسىن تاۋىپ، ادامنىڭ ارقاسىنا «مەنى تەپ!» دەگەن قاعازدى جاپسىرىپ قويادى. بۇل كۇننىڭ ءوزى دە سولاي اتالادى. ءسويتىپ، جۇرت جاپاتارماعاي ازىلدەسىپ، كۇلىسىپ، كۇنىن كوڭىلدى وتكىزەدى.

نەمىستەر كۇلكى كۇنى تۋعان بالا باقىتسىز بولادى دەپ سەنەدى

ال نەمىستەر ءۇشىن بۇل كۇن ساتسىزدىككە تولى. ويتكەنى جۇرت وسى كۇنى تۋعانداردى باقىتسىز نەمەسە الاڭعاسار بولادى دەپ ىرىمدايدى. ورتا عاسىرلاردا بۇل حالىق 1-ساۋىردە باستالعان ءىس ءساتسىز بولادى دەپ سەنگەن. ءالى كۇنگە حالىقتىڭ بۇل كوزقاراسقا سەنىمى سەيىلمەگەن. سول سەبەپتى بالاسىن وسى كۇنى دۇنيەگە الىپ كەلگەن اتا-انالار ءسابيدىڭ تۋۋ تۋرالى قۇجاتىن 1-2 كۇن كەيىن نەمەسە الدىن الا راسىمدەۋگە تىرىسادى.

BBC: تال باسىندا سپاگەتتي ءوسىردى

ا ق ش پەن كانادادا تۇرعىندار بۇل كۇندى جالعان اقپارات تاراتىپ، قىزىقتى وتكىزەدى. جۇرتتان بۇرىن جەرگىلىكتى ب ا ق بۇل كۇنگە ەرەكشە باسىمدىق بەرەدى. ءبىرىنشى بولىپ بۇل باستامانى ايگىلى BBC تەلەارناسى جۇزەگە اسىرعان ەكەن. بريتاندىق ارنا 1957 -جىلى كورەرمەنگە شۆەيسارياداعى شارۋالاردىڭ سپاگەتتي ءوسىرىپ جاتقانى تۋرالى جاڭالىق كورسەتتى. اعاشتا ءوسىپ تۇرعان ءونىمدى جيناپ جاتقان ادامداردىڭ كورىنىسىن تەلەارنادان تاماشالاعان جۇرت اقپاراتقا سەنىپ قالعان. ءسويتىپ، BBC- گە حابارلاسىپ، ءوز باقشالارىندا سپاگەتتي ءوسىرۋدىڭ ءتاسىلىن سۇراپتى.

يىسكەۋ ارقىلى اقپارات ىزدەۋگە بولادى

تاعى ءبىر الىپ كومپانيا Google وسىدان 12 جىل بۇرىن 1-ساۋىردە جۇرتتى ەرەكشە جاڭالىعىمەن ەلەڭ ەتكىزدى. ولار ىزدەۋ جۇيەسىنە Google Nose، ياعني Google مۇرىن دەپ اتالاتىن جاڭا نۇسقاسىن ىسكە قوستىق دەپ حابارلاعان. تيىمدىلىگى سول، پايدالانۋشى سايتتان ىزدەگەن زاتىن يىسكەۋ ارقىلى تابا الاتىنى تۋرالى ايتىلعان. ءبىراق ارتىنشا مۇنىڭ كۇلكى كۇنىنە ارنالعان جالعان اقپارات ەكەنىن حابارلادى.

Fake: ايدىڭ ءتۇسى جاسىلعا بويالادى

NASA- نىڭ اتىن جامىلعان فەيك باسىلىم 2016 -جىلدىڭ ءدال وسى كۇنى اي جاسىل تۇسكە بويالادى دەپ كوپتى تاڭعالدىرعان ەدى. سونداي-اق ولار بۇل وقيعانىڭ 420 جىلدا ءبىر رەت بولاتىن قۇبىلىس ەكەنىن اشىق جازعان. الەۋمەتتىك جەلىدە تەز تارالعان جاڭالىققا جەر شارى حالقى سەنىپ قالعان.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى