«كەلەشەك» ءبىرىڭعاي ەرىكتى جيناقتاۋ جۇيەسى قانداي مۇمكىندىك بەرەدى

مەملەكەت باسشىسىنىڭ تاپسىرماسى بويىنشا «كەلەشەك» ءبىرىڭعاي ەرىكتى جيناقتاۋ جۇيەسىن ەنگىزۋ جونىندەگى زاڭ جوباسى ازىرلەنىپ، ونى قازاقستان رەسپۋبليكاسىنىڭ پارلامەنتى تالقىلادى. جاقىندا سەنات «كەلەشەك» ەرىكتى جيناقتاۋ جۇيەسىنە قاتىستى زاڭدى ماقۇلدادى.

جۇيە بويىنشا قازاقستاندا، شەتەلدە كاسىپتىك- تەحنيكالىق، جوعارى، جوعارى وقۋ ورنىنان كەيىنگى بىلىمگە اقى تولەۋ ماقساتىندا قاراجاتتى جيناقتاۋعا بولادى. اعىمداعى كۇنتىزبەلىك جىلى 5 جاسقا تولعان بالالار ءۇشىن سالىمداردى ەكىنشى دەڭگەيدەگى بانكتەردە جانە ءومىردى ساقتاندىرۋ كومپانيالارىندا اشۋ مۇمكىندىگى بەرىلەدى. مۇنىڭ تارتىمدىلىعىن ارتتىرۋ رەتىندە سالىمشىلارعا مەملەكەتتەن جىل سايىنعى سىيلىقاقى بەرۋ، ينۆەستيتسيالىق كىرىس الۋ (باستاپقى ءبىلىم بەرۋ كاپيتالىن (60 ا ە ك)، جىل سايىنعى مەملەكەتتىك سىيلىقاقى (%5 جانە %7)، بانكتىڭ سىياقىسىن نەمەسە ساقتاندىرۋ ۇيىمىنىڭ ينۆەستيتسيالىق كىرىسى (ورتا ەسەپپەن %12) الادى)، سالىمعا كەپىلدىك بەرۋ، ءوندىرىپ الۋدان بوساتىلۋ جانە وقۋ ورنىن تاڭداۋ بويىنشا شەكتەۋلەردىڭ بولماۋى مۇمكىندىكتەرى قارالعان.

جۇيەنىڭ مىندەتى

عىلىم جانە جوعارى ءبىلىم مينيسترلىگىنىڭ مالىمەتىنشە، «كەلەشەك» جۇيەسى مەملەكەتتەن باستاپقى ءبىلىم بەرۋ كاپيتالىن، مەملەكەتتىك سىيلىقاقىنى جىل سايىن تولەۋدى، ينۆەستيتسيالىق تابىستى ەسكەرىپ وتىر. بۇل جيناقتار «ۇلتتىق قور - بالالارعا» جوباسى اياسىندا قالىپتاستىرىلعان قاراجاتپەن بىرگە بالالارعا ساپالى ءبىلىم الۋعا مۇمكىندىك بەرەدى.

«كەلەشەك» الدىندا ءۇش نەگىزگى مىندەت تۇر:

بىلىمگە قولجەتىمدىلىكتى كەڭەيتۋ
مەملەكەتتىك قولداۋدىڭ بارلىق شارالارىن ءبىر ءبىرىڭعاي جۇيەگە شوعىرلاندىرۋ
ءاربىر اتا- انا بالاسىنىڭ كىشكەنتاي كەزىنەن باستاپ وقۋ تراەكتورياسىن قۇرا الاتىن جۇيەنى قۇرۋ.
ايتا كەتۋ كەرەك، «كەلەشەك» - مەملەكەتتىك قولداۋدىڭ قوسىمشا شاراسى جانە مەملەكەتتىك گرانتتاردى بەرۋدى الماستىرمايدى. سونىمەن قاتار، ول تولىعىمەن ەرىكتى نەگىزدە بولادى.

- «كەلەشەك» سالىمدارى ەكىنشى دەڭگەيدەگى بانكتەردە جانە ءومىردى ساقتاندىرۋ كومپانيالارىندا اشىلادى، وندا مەملەكەتتەن جىل سايىنعى سىيلىقاقىلار، ينۆەستيتسيالىق تابىس، سالىمدارعا كەپىلدىك بەرۋ، سونداي- اق ءوندىرىپ الۋدان قورعاۋ قاراستىرىلعان. باستاپقى ءبىلىم بەرۋ كاپيتالى 5 جاسار بالالارعا بيۋدجەتتەن ءبىر رەت 60 ا ە ك مولشەرىندە، جەتىم بالالار مەن اتا- اناسىنىڭ قامقورلىعىنسىز قالعان بالالار ءۇشىن - 120 ا ە ك مولشەرىندە ەسەپتەلەتىن بولادى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

«نەلىكتەن 5 جاسار بالالار؟» دەگەن سۇراق تۋىنداۋى مۇمكىن. بۇل تۇرعىدا 18 جاسقا تولعانعا دەيىن 13 جىل ىشىندە وتباسىلىق بيۋدجەتكە ايتارلىقتاي جۇكتەمە سالماي، ءبىلىم الۋعا قاراجات جيناۋعا بولادى. سونىمەن قاتار، ازاماتتىڭ قالاۋى بويىنشا بالا 18 جاسقا تولعاندا جيناقتالعان سومانى ۇلعايتۋ ءۇشىن «كەلەشەككە» ۇلتتىق قوردىڭ اقشاسىن اۋدارا الادى.

اتاپ ايتقاندا، «كەلەشەك» جۇيەسىنىڭ تۇجىرىمداماسىن ازىرلەۋ كەزىندە ينفلياتسيالىق جانە ديەۆالۆاتسيالىق تاۋەكەلدەرگە بايلانىستى جيناقتاردىڭ ساقتالۋىن جانە جۇيەنىڭ تارتىمدىلىعىن قامتاماسىز ەتۋ ماسەلەسى دە قارالدى.

بۇل رەتتە، ەگەر بالا ءبىلىم بەرۋ ۇيىمىنا گرانتقا تۇسسە، وندا ودان ءارى ول جيناقتاۋدى جالعاستىرۋ، ءوز جيناقتارىن ءۇشىنشى ادامنىڭ پايداسىنا اۋدارۋ، ءبىلىم بەرۋدىڭ باسقا دەڭگەيلەرىن الۋعا جىبەرۋ، تۇرعىن ءۇي الۋعا يگەرۋ مۇمكىندىگىن الادى. ال ديپلوم العان جاعدايدا، بارلىق تولەمدەرمەن قوسىمشا قاراجات الۋ مۇمكىندىگى پايدا بولادى.

كەلەشەك شوتتارىن ەكىنشى دەڭگەيدەگى بانكتەردە جانە بالالارعا ارنالعان مەملەكەتتىك ءبىلىم بەرۋ جيناقتاۋ جۇيەسىنە (م ب ج ج) قاتىسۋشى ساقتاندىرۋ كومپانيالارىندا اشۋعا بولادى. وسىعان بايلانىستى اتا-انالار وسى شوتتاردى اشقاننان كەيىن، جىل سايىن حالىقتىڭ الەۋمەتتىك وسال توپتارى ساناتىنداعى بالالار ءۇشىن 12 ا ە ك (اي سايىن 1 ا ە ك- تەن) جانە قالعان بالالارعا 24 ا ە ك مولشەرىندە ەڭ تومەنگى جارنا تولەۋى ءتيىس.

جۇيەنىڭ ارتىقشىلىقتارى:

اتا- انالار مەن مەملەكەت مۇددەلەرىنىڭ سيمبيوزى
اتا- انالار جيناقتارىنىڭ ورتاشا كولەمى 3 ميلليون تەڭگەنى جانە ودان دا كوپ سومانى قۇرايدى
اتا- انالار مەملەكەت تاراپىنان جاردەمدەسۋ ارقىلى بولاشاقتا ءوز بالالارى ءۇشىن ءبىلىم الۋدىڭ وزىندىك ستراتەگياسىن قۇرا الادى
ءبىلىم بەرۋ شوتىندا جيناقتالعان قاراجاتتى قۇنسىزدانۋدان قورعايدى
گرانت/ديپلوم العان كەزدە جيناقتالعان قاراجاتتى تۇرعىن ءۇي ساتىپ الۋعا پايدالانۋعا مۇمكىندىك بەرەدى.
ءبىلىم گرانتتارىنىڭ سانى ازايمايدى

عىلىم جانە جوعارى ءبىلىم مينيسترلىگىنىڭ اقپاراتىنا قاراعاندا، قازىرگى كەزدە مەملەكەتتىك ءبىلىم بەرۋ تاپسىرىسى مەكتەپ تۇلەكتەرىنىڭ 40 پايىزدان استامىن گرانتپەن قامتۋعا مۇمكىندىك بەرەدى. بۇل رەتتە، 2020 -جىلدان باستاپ گرانتتار سانى جىل سايىن ورتا ەسەپپەن 10 پايىزعا ۇلعايتىلادى.

- دەگەنمەن، بەلسەندى دەموگرافيالىق وسىمگە بايلانىستى گرانتتاردىڭ بۇل سانى جەتكىلىكسىز. «كەلەشەك» جۇيەسى - مەملەكەتتىك گرانتتاردى بولۋمەن قاتار ىسكە اسىرىلاتىن قوسىمشا مەملەكەتتىك شارا ەكەنىن اتاپ وتكەن ءجون. سونىمەن قاتار، بۇل جۇيەنى تولىعىمەن ەرىكتى تۇردە قولدانا الادى، - دەلىنگەن عىلىم مينيسترلىگىنىڭ Kazinform اگەنتتىگىنە بەرگەن جاۋابىندا.

كەلەسى جىلدارى ءبىلىم گرانتتارىنىڭ سانى ارتادى. قازاقستان رەسپۋبليكاسىندا جوعارى ءبىلىمدى جانە عىلىمدى دامىتۋدىڭ 2023-2029 -جىلدارعا ارنالعان تۇجىرىمداماسىنا سايكەس، سۇرانىسى بار دايارلاۋ باعىتتارى، ونىڭ ىشىندە تەحنيكالىق باعىتتار بويىنشا جوعارى ءبىلىم الۋ ءۇشىن مەملەكەتتىك ءبىلىم بەرۋ گرانتتارى سانىن ۇلعايتۋ (2029 -جىلعا قاراي كەمىندە 75 مىڭ) ەسكەرىلگەن.

ۆەدومستۆو مالىمەتىنشە، 2024-2025 وقۋ جىلىندا ءبىلىم بەرۋ گرانتتارىنىڭ سانى الدىڭعى جىلمەن سالىستىرعاندا 5000 ءبىلىم بەرۋ گرانتىنا كوبەيگەن.

- بۇل رەتتە، ءبىلىم بەرۋ گرانتتارىنىڭ سانىن كوبەيتۋ بويىنشا ءتيىستى جۇمىستاردى مينيسترلىك ۇزدىكسىز جالعاستىرادى، - دەپ اتالىپ وتكەن مينيسترلىك اقپاراتىندا.

ەرەجەلەر 2025-جىلى كۇشىنە ەنەدى

بيىل 12 - جەلتوقساندا سەناتتا ماقۇلدانعان زاڭ اياسىندا «كەلەشەك» ەرىكتى جيناقتاۋ جۇيەسىنە قاتىستى نورمالار بەكىتىلدى. وسى ورايدا عىلىم جانە جوعارى ءبىلىم ۆيتسە- ءمينيسترى تالعات ەشەنقۇلوۆ 2025 -جىلدىڭ باسىنان «كەلەشەك» ەرەجەلەرى كۇشىنە ەنەتىنىن ءمالىم ەتتى.

- بۇل زاڭعا قول قويىلعاننان كەيىن 60 كۇننىڭ ىشىندە «كەلەشەككە» قاتىستى نورمالار كۇشىنە ەنەدى، ياعني كەلەسى جىلعا جوسپارلانىپ وتىر. «كەلەشەك» ءبىرىڭعاي ەرىكتى جيناقتاۋ جۇيەسى وسىعان دەيىن ىسكە قوسىلعان مەملەكەتتىك ءبىلىم بەرۋ جۇيەسىنىڭ پلاتفورماسىندا جۇزەگە اسىرىلادى. «كەلەشەكتىڭ» ەرەكشەلىكتەرىنە توقتالساق، ونىڭ جۇيەسىندە العاشقى ءبىلىم بەرۋ كاپيتالى ەسكەرىلگەن. بۇعان دەيىن وسىنداي مۇمكىندىك بولماعان. ەندى ەسەپشوت اشىلعاننان كەيىن، كۇنتىزبەلىك جىلدا 5 جاسقا تولعان بالالاردىڭ (ەسەپشوتى بارلارعا) بارلىعىنا مەملەكەت جاعىنان باستاپقى ءبىلىم بەرۋ كاپيتالى قۇيىلادى. ونىڭ سوماسى بارلىق بالاعا مەملەكەتتەن 60 ا ە ك كولەمىندە، ال جەتىم بالالار مەن اتا- اناسىنىڭ قامقورلىعىنسىز قالعان بالالار ءۇشىن 120 ا ە ك قاراستىرىلعان، - دەدى ت. ەشەنقۇلوۆ Kazinform تىلشىسىنە بەرگەن سۇحباتىندا.

سونىمەن قاتار ول كەيىننەن جوعارى ءبىلىم الۋعا تالپىنعان جاستارعا «كەلەشەك» جۇيەسى مەن «ۇلتتىق قور - بالالارعا» جوباسىنىڭ جيناقتارىن پايدالانۋعا قاتىستى تۇسىنىك بەردى.

- نەگىزى، «كەلەشەك» ءبىلىم الۋدىڭ قوسىمشا باعىتى رەتىندە قارالىپ وتىر. مۇنىمەن قوسا، جىل سايىن بولىنەتىن مەملەكەتتىك ءبىلىم گرانتتارى دا ساقتالادى. بۇدان بولەك، «ۇلتتىق قور - بالالارعا» جوباسى دا قوسىمشا مۇمكىندىك بەرەدى. ءبىراق، اتا- انالار ەكى ەسەپشوتتى بىرىكتىرەمىز دەسە، وسى قاراجاتتى كەيىننەن «كەلەشەك» شوتىندا جيناقتاۋ مۇمكىندىگى بولادى. بۇل باعىتتا ءتيىستى قادامدار پىسىقتالادى، - دەدى ۆيتسە- مينيستر.

ەسكە سالساق، مەملەكەت باسشىسى قاسىم- جومارت توقايەۆ 2023 -جىلى قازاقستان حالقىنا جولداۋىندا مەملەكەتتىڭ ءبىلىم سالاسىنا قاتىستى جۇمىسىندا تۇتاستىق، ياعني جۇيە جوقتىعىنا توقتالعان بولاتىن. وسى رەتتە 5 جاستان اسقان بالالارعا ارنالعان «كەلەشەك» اتتى ءبىرىڭعاي ەرىكتى جيناقتاۋ جۇيەسىن ەنگىزۋدى تاپسىرعان ەدى.

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى