كايا كاللاس: ە و قازاقستانمەن ستراتەگيالىق سەرىكتەستىكتى تەرەڭدەتۋدى كوزدەيدى
استانا. KAZINFORM - ەۋروپالىق وداق قازاقستاندى ورتالىق ازياداعى نەگىزگى سەرىكتەس رەتىندە قاراستىرادى جانە ەنەرگەتيكا، ساۋدا، ەكولوگيالىق تۇراقتىلىق پەن ءبىلىم سىندى ماڭىزدى سالالارداعى ىنتىماقتاستىقتى كەڭەيتۋگە دايىن.
بۇل تۋرالى ە و جوعارعى وكىلى كايا كاللاس Silk Way تەلەارناسىنا بەرگەن سۇحباتىندا ايتتى.
- قازاقستان-ەۋروپالىق وداق ءۇشىن وتە ماڭىزدى سەرىكتەس. ءبىز قارىم-قاتىناسىمىزدى، اسىرەسە ەكولوگيا، ەنەرگەتيكا جانە ساۋدا ماسەلەلەرىندە تەرەڭدەتە الامىز، - دەدى كاللاس سۇحبات بارىسىندا.
ول ە و- نىڭ جاسىل جانە تسيفرلىق ەكونوميكاعا كوشۋگە قاجەتتى ماڭىزدى شيكىزاتقا قىزىعۋشىلىق تانىتاتىنىن اتاپ ءوتىپ، وسى سەكتورلاردى دامىتۋداعى ءوزارا مۇمكىندىكتەرگە توقتالدى.
- بىزدە تەحنولوگيا مەن نوۋ-حوۋ بار. ەۋروپا ادامدار ءۇشىن دە، عالامشار ءۇشىن دە ينۆەستيتسيا سالىپ، جاڭا مۇمكىندىكتەر جاساۋعا دايىن، - دەدى ول.
كاللاس سونداي-اق ەنەرگيانى ءارتاراپتاندىرۋدىڭ ماڭىزدىلىعىنا توقتالىپ، قازاقستاننىڭ بۇرىن ءبىر عانا ەل رەسۋرستارىنا تىم تاۋەلدى بولعانىن اتاپ ءوتتى.
- ەنەرگيا جەتكىزۋدە تەپە-تەڭدىكتى جانە قاۋىپسىزدىكتى قامتاماسىز ەتۋ ءۇشىن بىرنەشە سەرىكتەستىڭ بولۋى ماڭىزدى، - دەدى ول.
جاھاندىق تۇراقسىزدىق جاعدايىندا قاۋىپسىزدىك ەۋروداقتىڭ سىرتقى ساياساتىنىڭ، ونىڭ ىشىندە ورتالىق ازيامەن قارىم-قاتىناسىنىڭ ورتالىق باعىتىنا اينالدى.
- قاۋىپسىزدىكتىڭ وتە كۇردەلى جاعدايىندا ءومىر ءسۇرىپ جاتىرمىز. سوندىقتان قاۋىپسىزدىك ماسەلەسىن مىندەتتى تۇردە تالقىلاۋىمىز قاجەت، - دەدى كاللاس.
سونىمەن قاتار ە و ءبىلىم بەرۋ، زەرتتەۋ جانە ترانسكاسپي كولىك ءدالىزى مەن Erasmus+ الىس-بەرىس ءبىلىم باعدارلاماسىن قوسا العاندا ينفراقۇرىلىم سالالارىندا جان-جاقتى ىنتىماقتاستىقتى قولدايدى.
- سامارقاندا وتەتىن ە و- ورتالىق ازيا سامميتىنە دايىندالۋدامىز. وندا ساۋدا، ەنەرگەتيكا جانە كولىك بايلانىسىنداعى ءوزارا قاتىناستىڭ ماڭىزدى قورىتىندىسىن شىعارامىز، - دەدى ول.
سۇحبات بارىسىندا كاللاس ورتالىق ازيادا وركەندەپ كەلە جاتقان ايماقتىق ىنتىماقتاستىققا قولداۋ ءبىلدىرىپ، ە و مەن قازاقستاننىڭ بارىنشا مىعىم بايلانىسىنا سەنىممەن قارايتىنىن جەتكىزدى.
ايتا كەتەيىك، بۇگىن قازاقستان پرەزيدەنتى ەۋروپا وداعىنىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى - ەۋروپالىق كوميسسيانىڭ ۆيتسە-پرەزيدەنتى كايا كاللاسپەن كەزدەستى.
اۆتور
مارلان جيەمباي
