كاتونقاراعاي اۋدانىنىڭ حالقى مال سوياتىن قاساپحانا تاپپاي، قينالىپ وتىر

جۇمىس ىستەپ تۇرعان جار دەگەندە جالعىز قاساپحانا اۋدان ورتالىعىندا ورنالاسقان. ال وعان بارىپ وتىرۋ - قالتاعا قوسىمشا سالماق.

«الىپ- ساتارلارعا ارزانعا بەرۋگە ءماجبۇرمىز»

كاتونقاراعاي اۋدانىندا حالىقتىڭ نەگىزگى ەكى تابىس كوزى بار. ونىڭ ءبىرى - مال شارۋاشىلىعى، ەكىنشىسى - تۋريزم. التايدىڭ التى ايعا سوزىلاتىن قىسىندا تۋريزمنەن پايدا تۇسپەيدى. سول ءۇشىن ەلدىڭ كوبى قازاقستاننىڭ بارلىق اۋىلدارىنداعى سياقتى ءتورت-تۇلىكتىڭ سۇمەسىن ءناپاقا ەتەدى. الايدا جۇرت ەلدى مەكەندەردە قاساپحانانىڭ جوقتىعى قيىندىقتىڭ قامىتىن كيگىزىپ تۇرعانىن ايتۋدا.

- بىزدە اۋدان بويىنشا جالعىز قاساپحانا بار. ول كاتونقاراعاي اۋىلىندا ورنالاسقان. مىسالى، ءبىر جىلقىنى سويۋ ءۇشىن كولىك جالداپ، ونى سول جاققا تاسۋعا تۋرا كەلەدى. ودان سوڭ سويىپ بەرگەن قاساپشى مەن انىقتاما جازعان مال دارىگەرىنە اقشا تولەيمىز. سوندا ءبىر جىلقىنىڭ ەتىن ساتامىن دەپ قانشاما ابىگەرگە تۇسەمىز، - دەيدى تۇرعىندار.

اۋدان ورتالىعىنا جاقىن اۋىلدارعا ءسال جەڭىلدەۋ. الايدا بەرەل سياقتى 80 شاقىرىم جەردەگى اۋىلداردىڭ حالقىنا بۇل قوسىمشا شىعىن.

- وسىنىڭ سالدارىنان مالىمىزدى الىپ-ساتارلارعا ارزانعا بەرە سالامىز. ولار وزدەرى مالدىڭ ءبارىن جيىپ، سويدىرۋعا اپارادى. سولارعا ءتيىمدى. ال ءبىز سياقتى قاراپايىم مالشىلار مىنا قىمباتشىلىق قىسىپ بارا جاتقان ۋاقىتتا پايدا كورە الماي وتىرمىز، - دەپ نارازىلىقتارىن ءبىلدىردى كاتونقاراعايلىقتار.

اكىمدىك نە دەيدى؟

تالايدى تولعانتقان تۇيتكىلدى ماسەلەگە قاتىستى اۋدان اكىمدىگىنىڭ جاۋابىن ءبىلۋ ءۇشىن رەسمي ساۋالحات جولدادىق.

- اۋىل شارۋاشىلىعى ءمينيسترىنىڭ 2015 -جىلعى 27 -ساۋىردەگى №7-1/370 بۇيرىعىنا سايكەس، ەتى ساۋدالاناتىن كەز كەلگەن مال ارنايى قاساپحانالاردا سويىلۋى شارت. الايدا مال سويۋ نىساندارىن مەملەكەت تاراپىنان سالۋ، قارجىلاندىرۋ، كۇتىپ-ۇستاۋ قاراستىرىلماعان. قىزمەتتىڭ بۇل ءتۇرى ۆەتەريناريالىق كاسىپكەرلىك بولىپ سانالادى. ياعني، مۇنداي الاڭداردى جەكە كاسىپكەرلەر نەمەسە اۋىل ادامدارى بىرلەسە وتىرىپ، ءوز قاراجاتتارىنا سالۋى كەرەك، - دەپ جاۋاپ بەردى كاتونقاراعاي اۋدانى اكىمىنىڭ مىندەتىن اتقارۋشى راسۋل كارابالينوۆ.

ونىڭ ايتۋىنشا، كاتونقاراعاي اۋىلىنداعى قاساپحانا 2008 -جىلى اشىلعان. جەر كولەمى 1 گەكتاردى قۇرايدى.

- عيمارات ءىشىنىڭ كولەمى - 150 شارشى مەتر. اۋلاسىندا 50 باسقا ارنالعان قوراسى بار. 60 توننا ەت ساقتايتىن توڭازىتقىشپەن جابدىقتالعان. كۇنىنە 25-30 باس مالدى قابىلدايدى. ياعني، 5 تونناعا دەيىن ەت سويۋعا بولادى. قاساپحانا يەسى - جەكە كاسىپكەر گاۋحار تاۋكەنوۆا، - دەيدى راسۋل كارابالينوۆ.

دەمەك، بۇل ماسەلەدە اۋىل حالقى اكىمدىكتەن ءۇمىت كۇتپەي، وزدەرى امالداۋلارى ءتيىس. قالتاسى قالىڭ جەكە كاسىپكەرلەرگە قولقا سالىپ نەمەسە «كوپ تۇكىرسە - كول» دەگەندەي، وزدەرى جيىستىرىپ قاساپحانالار سالۋلارى قاجەت.

ەسكە سالساق، بۇعان دەيىن اۋىل شارۋاشىلعى ءمينيسترى ايداربەك ساپاروۆ مال شارۋاشىلىعىن دامىتۋعا كووپەراتيۆتەر ارقىلى بەرىلىپ كەلگەن سۋبسيديالار توقتايتىنىن ايتقان.

تەگتەر:

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى