كاتونقاراعاي اۋدانىندا جۇمىس ۋاقىتى ءبىر ساعاتقا كەرى شەگەرىلدى

كاتونقاراعاي اۋدانىندا مەملەكەتتىك جانە الەۋمەتتىك مەكەمەلەردە پيلوتتىق رەجيمدە جاڭا جۇمىس كەستەسى ەنگىزىلدى.

ەندى اۋدانداعى 40 مەكەمە اپتاسىنا بەس كۇن ساعات 08:00 دەن 17:30 عا دەيىن جۇمىس ىستەيدى. تۇسكى ءۇزىلىس 12:00 دەن 13:30 عا دەيىن. مۇنداي جۇمىس رەجيمىنە كوشۋ تۋرالى شەشىم تۇرعىندارمەن بولعان تالقىلاۋلاردان كەيىن قابىلدانىپ وتىر.

جەلتوقسان ايىندا اۋدانعا ءبىر توپ وبلىستىق باسقارمالار باسشىلارى كەلىپ، سونىڭ ىشىندە ورەل، ارشاتى، بەرەل، جامبىل جانە تاعى باسقا جيىنى 18 ەلدى مەكەندە كەزدەسۋلەر وتكىزدى. سول كەزدەسۋلەر بارىسىندا جۇمىس كۇنىنىڭ باستالۋىن تاڭعى ساعات 08:00 گە اۋىستىرۋ جايى ءسوز ەتىلدى.

- جاڭا جۇمىس ۋاقىتى كليماتتىق جاعدايلار مەن جەرگىلىكتى تۇرعىنداردىڭ ءومىر ىرعاعىن ەسكەرە وتىرىپ، ونىمدىلىكتىڭ ارتۋى مەن ءوڭىردىڭ دامۋىنا ىقپال ەتەدى. سوندىقتان تۇرعىنداردىڭ پىكىرلەرى ەسكەرىلدى، - دەپ حابارلادى اۋداندىق ىشكى ساياسات بولىمىنەن.

كاتونقاراعايلىقتار دا بۇل جۇمىس كەستەسىنىڭ وزدەرىنە قولايلى ەكەنىن ايتىپ جاتىر.

ەسكە سالساق، بۇعان دەيىن كاتونقاراعاي اۋدانىنىڭ حالقى مال سوياتىن قاساپحانا تاپپاي، قينالىپ وتىرعانى جايلى جازعانبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى