كاسپيدە يتبالىقتار قىرىلۋىنىڭ سەبەبى انىقتالدى

بۇل تۋرالى «مۇناي جانە گاز كەن ورىندارىن يگەرۋ جاعدايىندا كاسپي ەكوجۇيەسىن ساقتاۋ ماسەلەلەرى» اتتى حالىقارالىق IX عىلىمي- تاجىريبەلىك كونفەرەنسيا اياسىندا بۇكىل رەسەيلىك بالىق شارۋاشىلىعى جانە مۇحيتتانۋ ينستيتۋتى عىلىمي- زەرتتەۋ ينستيتۋتى ديرەكتورىنىڭ عىلىمي جۇمىستار جونىندەگى ورىنباسارى ۆياچەسلاۆ بيزيكوۆ ءمالىم ەتتى. قازاقپارات بۇل تۋرالى تاسس اقپارات اگەنتتىگىنە سىلتەمە جاساپ حابارلايدى.

2022 -جىلدىڭ جەلتوقسانىندا كاسپيدىڭ داعىستانداعى جاعالاۋىندا 2,5 مىڭنان استام ءولى يتبالىق تابىلعانى حابارلانعان. بيزيكوۆتىڭ ايتۋىنشا، بۇدان كەيىن ماحاچكالادا قۇرىلعان مونيتورينگتىك توپ داعىستان جاعالاۋىنىڭ 340 شاقىرىمىن زەرتتەپ، ولگەن يتبالىقتاردىڭ سانىن 10 مىڭعا جەتكەنىن باعالاعان.

تابىلعان يتبالىقتارعا پاتولوگواناتوميالىق زەرتتەۋ جۇرگىزۋ ولار قىرىلعان كەزدە ساۋ بولعانىن جانە قىرىلۋى جاعالاۋعا شىعىپ قالۋىنان شامامەن 2-3 اپتا بۇرىن بولعانىن كورسەتتى.

بۇل رەتتە 2020 -جىلدىڭ جەلتوقسانىندا داعىستان جاعالاۋىنا يتبالىقتار كاسپي تەڭىزى باسسەينىنە ءتان تابيعي گاز شىعارىندىلارى سالدارىنان قىرىلعانىن كورسەتتى. ولاردىڭ قارقىندىلىعى جەر سىلكىنىسى كەزىندە كۇرت ارتادى. جەل بولماسا، بۇل شىعارىندىلار گاز لينزالارىن ءبولىپ، يتبالىقتار سودان تۇنشىعادى.

بيزيكوۆتىڭ اتاپ وتۋىنشە، 2020 -جىلدان باستاپ سولتۇستىك كاسپي تەڭىزىنىڭ رەسەيلىك جانە قازاقستاندىق ايماقتارىنىڭ اكۆاتوريالارىندا جىل سايىن كاسپي يتبالىقتارىن اۋەدەن ءتۇسىرۋ جۇمىستارى جۇرگىزىلەدى. بۇل جۇمىستاردىڭ قورىتىندىلارى ولاردىڭ جالپى سانىنىڭ سوڭعى جىلدارى تۇراقتى وسكەنىن كورسەتتى - 2020 -جىلعى 280 مىڭنان 2022 -جىلى 311 مىڭ داراعا دەيىن. 2023 -جىلى قازاقستان ايماعىنداعى اۋەدەن ءتۇسىرۋ جۇمىستارى يتبالىقتاردىڭ جالپى سانى 259852 باس بولعانىن كورسەتتى، بۇل وتكەن جىلمەن سالىستىرعاندا 51 مىڭعا از.

كاسپي يتبالىعى - كاسپي تەڭىزىندەگى جالعىز سۇتقورەكتى. حالىقارالىق تابيعاتتى قورعاۋ وداعى 2008 -جىلى وعان جويىلىپ بارا جاتقان مارتەبەسىن بەردى. ⅩⅩ عاسىردىڭ باسىندا كاسپيي تەڭىزىندەگى يتبالىقتاردىڭ سانى 1,2 ميلليون دارانى قۇراعان. ⅩⅩ عاسىردىڭ 70- جىلدارى كاسپي تەڭىزىن قارقىندى يگەرۋ كەزىندە جانۋارلاردىڭ سانى 600 مىڭعا دەيىن قىسقاردى.

اۆتور

زارينا تۋعانبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى